Sarawak deka nitihka pelin industri kayu Estonia
Pelin tu iya nya ngena chara digital ngambika nyungkak pengawa nanam pun kayu di nengeri tu
KUCHING: Sarawak nyangka deka nitihka pelin industri kayu menua Estonia ke ngena ‘simulation’ tauka nanam pun kayu nengah chara digital.
Kepala Menteri Datuk Patinggi Abang Johari Tun Openg madah pengawa nanam pun kayu tetap deka dipajakka.
“Aku deka meda semua kitai tu nanam pun kayu, ke nyadi pemerat ba industri kayu, lalu aku empu udah ngasuh semua kompeni kayu di menua tu ngaga pengawa ke sebaka iya nya chakah bejalaika pengawa nanam pun kayu.
“Chara kitai nanam pun kayu enda tau enda sistematik, lalu patut ngena model ke baru kelebih agi diatu, ulih ngena chara ‘Simulation’.
“Di Estonia, sida bisi sistem data ke ulih dikena ke tanah, datai tanah sereta profil tanah, ke ulih di (simulate) kitai, kitai ulih nanam pun kayu nitihka sistem nya, ni pengelama iya ulih nyadi besai, ni naka peninggi pun kayu nya ila…Semua ulih ngena data (analytical),” ku Abang Johari.
Iya madah munyi nya lebuh bejaku ngemunka atur pengawa Muka Karnival Produk Kampung Ukai Kayu ( NTFP) Heart of Borneo (HoB) Sarawak 2017’ ti diatur Opis Kampung enggau Opis Menteri Pemansang Mengeri enggau Rampa Menua di Kuching Waterfront ditu, kemari.
Abang Johari ti mega nyadi Menteri Pemansang Mengeri enggau Rampa Menua madah chara kitai di Sarawak ngemutarka tanah sereta kampung kitai, ke pengabis manah, kelebih agi ba sitak HOB.
“Tu meh pesaka kitai ke pengabis berat di Borneo, pulau ketiga ke pengabis besai di dunya sereta ke pengabis besai di Asia.
“HoB patut diintu enggau manah, laban nya berat ba rayat di Borneo, Kalimantan, Sabah, Sarawak enggau Bru- nei, laban tu meh ke nyadi tungkul ati kitai. Nya alai, ari sukut perspektif Sarawak, kitai sigi komited nyaga ‘tungkul ati’ kitai,” ku iya.
Bepelasarka pemujur kampung enggau tanah menua tu, Abang Johari madah palan pelajar baka Yayasan Sarawak diberi basa nyendiaka sekularsip sereta wang turu ke bala nembiak ke deka ngambi kus ke bisi bekait enggau nyaga kampung tauka tanah menua tu.
“Yayasan Sarawak bisi nyendiaka kus baka ‘Genetic Engineering’, ‘Molecule Biology’ enggau ‘ 3D printing’ ke nyadi kus ke relevan ke nembiak laban jemah ila, industri tu ke deka meri empas dalam industri kayu.
“Lebuh nya mujur ila, kitai bisi orang ke ulih gawa ba industri kayu, ngipak ke pekara ke dipelajar sida iya bekait enggau tanah tauka kampung, ke meri pemisi ke menua tu nyengkaum kitai mega (contribute) ngagai rampa menua gadung,” ku iya.
Sama bisi enggau ngulu atur pengawa nya kemari, Sapit Kepala Menteri Datuk Amar Awang Tengah Ali Hasan, Menteri Muda Perambu Mengeri, Ngemutarka Pekara bekait enggau Tanah enggau Rampa Menua, Datu Len Talif Salleh, Sekretari Mendam Opis Menteri Pemansang Mengeri enggau rampa Menua, dr wan Liz Othman, Direktor Opis Kampung, Sapuan Ahmad enggau chairman Harwood Timber, Tan Sri Datuk Amar Bujang Nor.
Aku deka meda semua kitai tu nanam pun kayu, ke nyadi pemerat ba industri kayu, lalu aku empu udah ngasuh semua kompeni kayu di menua tu ngaga pengawa ke sebaka iya nya chakah bejalaika pengawa nanam pun kayu. Datuk Patinggi Abang Johari Tun Openg Kepala Menteri