PAS deka nyediaka penuduk ungkup chalun ukai Islam maya PRU14
KUCHING: Parti Islam Se Malaysia (PAS) udah besedia napi Pengawa Bepilih Besai ke-14 (PRU14) ke disadang deka digaga dalam timpuh ke semak tu ila, lalu PAS mega agi enda jera deka nudukka chalun ukai Islam bediri ngena tikit PAS.
Sapit Ketuai Pemuda PAS Malaysia Ir. Khairil Nizam madah, PAS ngembuan sebuah palan ke dikumbai ‘ Dewan Perhimpunan Penyokong PAS’ (DPPP) alai penemu numbuhka sayap nya dalam PAS ti meri peluang ngagai orang ke ukai Islam bediri atas kerusi PAS.
“Penyampau chalun nya nyauka sebaka, baik nya di Semenanjung Malaysia tauka di Sabah enggau Sarawak, semina endur sereta pemayuh kerusi ke deka alai bediri bedau ditetapka.
“Tang kami (PAS) meri peluang ngagai orang ke ukai Islam bediri ba kerusi PAS, lalu chalun ke ukai Islam bediri atas tikit PAS, deka diambi ari sayap PAS, ke dikumbai ‘Gagasan Sejahtera’ nyengkaum DPPP,” ku Khairil.
Iya madah munyi nya ba aum media pengudah nembukan pengawa bemain bowling begulai enggau raban Media sereta Gerempung Ukai Dikuasa Perintah (NGO) di Megalanes Batu Kawa ditu, bedau lama.
Iya nandu baru madahka nganjung nama chalun ke PRU14 tauka tiap kali bisi pengawa bepilih, chara Opis Indu PAS milih nitihka proses ‘Majlis Shura Ulama’ ke deka ngeliska semua nama chalun sebedau mutuska sapa ke deka diasuh bediri ba tetiap sitak di menua tu.
“Nitihka proses, lis nama chalun deka dianjung ngagai ‘ Majlis Shura Ulama’ ngambika ulih di sidi dulu chalun nya, sebedau iya di asuh bediri ba kerusi PAS. Enti dikemendar ‘ Majlis Shura Ulama’, baru meh lis nya dipulaika baru ngagai Kaban Komiti PAS di renggat Indu Opis lalu netapka endur kerusi ke deka alai iya bediri.
Ba tanya pengarang berita, enti PAS enda jera seruran alah ba pengawa bepilih di menua tu, nyerumba baka ke nadai sukung ari rayat ba menua tu ungkup parti nya, ku Khairil:
“Kami seruran optimis, pelaba aku, bacha alah eng- gau menang nya, ukai semina beratika persepsi rayat tang mega penyendia injin PAS,” ku iya.
Ba penemu iya ba parti baru Parti Amanah Negara (PAN) ke betuaika ex-Menteri Besai Malaysia suba, Tun Dr. Mahathir Mohamad, iya nyerumbaka PAN nya meh ke mechahka undi ila.
“Tang taja pia, dini bengkah endur alai UMNO bediri, PAS tetap deka betangkup enggau UMNO,” ku iya.
Nangkan nya, Pesuruhjaya PAS Sarawak, Jofri Jaraiee madahka manifesto ke PAS Sarawak napi PRU14 tu bedau diputuska agi tang udah dibaumka bedau lama.
Dalam PRN ke-11, PAS bediri di tiga buah sitak, nyengkaum sebuah sitak ke diari ulih chalun Dayak, Clement Bayang ke bediri atas tikit PAS di Kakus, lalu iya mega nyadi chalun keterubah PAS ke ukai Islam.