Nembiak ke ngambi SPM, STPM dilalau anang kelalu main gajet
MIRI: Bala nembiak ti deka napi peresa perintah Sijil Pelajaran Malaysia ( SPM) enggau Sijil Tinggi Pelajaran Malaysia ( STPM) enda lama agi dilalau anang kelalu masau jam diri enggau telefon binching tauka gajet.
Menteri Muda Dagang Temuai, Seni enggau Main Asal, Datuk Lee Kim Shin, madah, sida tu patut ngulang baru pelajar dikena nyapai pemutus ti nyulut.
“SPM beguna endar laban iya nentuka pejalai dudi hari, nyema pas, bala nembiak ulih nampung pelajar ngagai universiti tauka milih bidang pengelandik,” ku iya rambau Majlis Graduasi SMK Pujut kemari.
Kaban Kunsil Nengeri ( ADUN) Senadin nya madah, dikena nyapai juluk nya, bala nembiak patut ningalka enda lama gajet sida, ngambika ulih beratka pengawa ngulang baru pelajar.
“Lengkaka enda lama telefon binching tauka gajet kita ngagai apai indai, seraya agi bisi awak, beri pemerat ba pengawa ngulang baru pelajar,” ku iya.
Nitih ku iya, puntan ba SPM ukai reti pelajar deka naka nya aja, tang bala nembiak bisi pilih ba bidang Pelajar Teknikal enggau Vokasional ( TVET).
“Apai indai patut sedarka bidang TVET mega bisi kereja enggau gaji besai lalu ukai semina ngemeratka kereja ‘ kolar putih,” ku iya nerang.
Pia mega ku iya, pengelandik ti dipelajar sida ba institusi pengelandik, bala pelatih tau gawa kediri empu sekalika nyadi elektrikal, welder tauka ke bukai.
“Bisi pelatih ari Miri bulih penatai pemisi RM30,000 sebulan bekereja di menua luar dalam bidang minyak enggau gis, makit kereja diatu tebal agi ngiga pekereja bepengelandik tinggi,” ku iya.
Berindik ari nya, apai indai ku iya, patut ngubah stigma sereta meri awak ngagai bala anak ngaul diri dalam bidang pengelandik ti diguna dalam industri bepe- natai pemisi ke tinggi.
Ba lansa bukai, bisi 403 iku nembiak nyulut nerima anugerah enggau setipikit sida empu rambau atur pengerami sehari nya.
Sama bisi datai Prinsipal SMK Pujut, Koh Chee Kiat, Chairman Pengatur Jocelyn James, Chairman Serakup Apai Indai enggau Pengajar ( PIBG) SMK Pujut, Albert Bangau sereta bala apai indai ke bukai.