Zon nadai chukai di Sarawak deka nyungkak industri dagang temuai

MIRI: Siti zon nadai chukai deka ditempa ba Sarawak dikena nambahka agi produk dagang temuai di nengeri tu belalauka gerah taun 2020 nyadi Taun Nemuai Ke Malaysia dalam Bajet 2018 ti dibantaika Menteri Besai Datuk Seri Najib Tun Razak, Hari Lima tu tadi.

Sekretari Besai Gerempung Hotel-hotel Malaysia (Pampang Sarawak) John Teo Peng Yew madahka mengeri Miri tau dikumbai nyadi palan strategik nyadi zon nadai chukai laban penuduk iya besemak enggau Brunei enggau Sabah.

“Sarawak patut ransing agi ngaduka zon nadai chukai ke alai Senadin di mengeri Miri nyadi palan iya laban kandang menua semak enggau garis entara menua Brunei,” ku iya madah ngagai Bernama ensanus.

Teo madah, bisi mayuh produk ti tau dikenuku nadai chukai baka gari, kereban berapi, kerita enggau barang pemakai.

“Langkawi nyangka tau nyadi chunto ti manah ungkup pengawa ngatur zon nadai chukai,” ku iya.

Ba rikod, penyauh Senadin ari Kompleks Kastam, Imigresen dan Kuarantin (CIQ) Sungai Tujuh iya nya 20 minit enggau lebih ari tiga juta temuai mansang palan meresa nya tetiap taun.

Iya ngerikod penambah temuai ti nyata berindik ari jam gawa dilanjar kenyau ari 1 September 2015, iya nya ari pukul 6 pagi nyentuk pukul 12 tengah malam, dibanding pukul 6 pagi nyentuk pukul 10 malam sebedau tu.

Menteri besai ke mega Menteri Wang lebuh mantaika Bajet 2018 madah, menua deka nyadi tuai pengatur sekeda program antarabansa dalam taun 2020, antara iya Sidang Kemuncak Kerjasama Ekonomi Asia Pasifik (APEC), Kongres Dunia mengenai Teknologi Maklumat enggau Mesyuarat KetuaKetua Kerajaan Komanwel.

Taun Nemuai Ke Malaysia ti keterubah iya dilanchar dalam taun 1990 nangkan 1994, 2007 enggau 2014. — Bernama