Pengajar interim enda patut diketu
Servis sida mengkang diguna laban Sarawak mengkang kurang pengajar
KUCHING: Parti Bansa Dayak Sarawak Baru (PBDSB) ensiban enggau pemutus Opis Menteri Pelajar ti udah ngetuka servis 75 iku pengajar interim peranak nengeri tu berengkah 30 Oktober tu tadi.
Presiden parti, Cobbold John Lusui madah servis pengajar interim tu mengkang diguna ketegal Sarawak mengkang kurang pengajar kelimpah ulih nyaup nentuka 90 peratus pengajar diarika peranak nengeri tu empu.
Cobbold mega madah Perintah Barisan Nasional (BN) Sarawak enda bebendar mutarka isu nya.
“Kena 31 Oktober 2017 kitai ninga berita sinu ke alai pengajar enterim ti enda mujur ba interbiu ba renggat ketiga enda ditampung servis agi.
“Isu ngetuka servis tu diputus pengudah sida enda mujur ba peresa psikomatrik,’ku Cobbold.
Iya nambah, dulu agi ari tu Menteri Pelajar Dato Seri Mahdzir Khalid kala mansutka jaku, pengajar enterim dijamin enda diketu.
Ku Cobbold, Iya (Mahzir) madah, tu ukai pengujung ngagai raban pengajar interim lalu enda setuju enggau ripot seiti surat berita ti madahka ‘End of The Road’, ti ngenang nasit sida nya.
“Iya madah pekara nya seraris enggau polisi 90:10, ke alai perintah keran nentuka 90 peratus pengajar di Sarawak diarika peranak nengeri tu empu.
“Kepala Menteri Sarawak pan madahka pekara ke sama pengudah berandau enggau Menteri Pelajar, ke alai servis pengajar interim enda deka diketu lalu semua pangku pengawa pengajar interim deka diberi ngagai peranak nengeri tu,”ku Cobbold.
Opis Kepala Menteri ku Cobbold, madahka servis sida enda deka diketu tang meseti napi interbiu lalu sida ke mujur aja deka diterima.
“Aku deka nemu kreadibiliti Perintah BN Sarawak sereta mega Menteri Pekara Pelajar, Sains enggau Pansik Teknologi Dato Seri Michael Manyin.
“Sida tu graduet ba kus ngajar, ketegal nya sida patut enda dikangau napi pengawa interbiu.
“Dini penegap runding Perintah BN? Sekalika sida semina mendingka jaku Perintah Besai?,”tanya iya.
Nitihka penerang ari Cobbold, tebal agi raban pengajar interim ke diketu nya ngarika bansa Dayak .
Iya ngarap nasit sida ulih diperatika enggau silik laban sida udah lama meri servis lalu sekeda nya udah bisi ruang bilik.
Ensanus, Manyin madahka raban pengajar interim nya diketu ketegal ti udah abis timpuh kontrek.