Jabu dichiri nyadi Pro-Canselor UNIMAS
SAMARAHAN: Datuk Patinggi Tan Sri Alfred Jabu sekali agi dichiri nyadi ProCanselor Universiti Malaysia Sarawak (UNIMAS) ungkup timpuh 2 taun.
Pekara tu dipansutka Mandal Canselor UNIMAS Profesor Datuk Dr Mohamad Kadim Suaidi ba penemuai basa ngagai Ex-sapit Kepala Menteri nya di Begunan SALCRA ditu, kemari.
Ba penemuai nya, Kadim bisi nyuaka surat chiri nyadi Pro-Canselor ke disain Tuai Megai Menua(TYT) Tun Pehin Sri Abdul Taib Mahmud ke mega Canselor UNIMAS.
“Pengawa tu seiti basa ke besai ngagai Datuk Patinggi (Jabu) ti udah ngaga ngereja pengawa ke chukup manah ba pemansang pelajar tinggi di UNIMAS.
‘ Kenyau 2013, tu mih kedua kali iya dichiri lalu ungkup renggat ketiga,’ku Kadim bejaku ngagai pengarang berita.
Pangku pengawa Jabu ke nyadi Pro-Canselor serak tu ungkup timpuh berengkah 8 Oktober 2017 nyentuk ngagai 7 Oktober 2019.
Sentang pengawa nya Jabu madah deka nyaup UNIMAS ngemansang ekonomi digital munyika peneka Kepala Menteri Datuk Patinggi Abang Johari Tun Openg.
Ku iya, pemansang ekonomi digital di nengeri tu meseti nyadi nyata ngambi ulih ngangkatka sarawak ngemgbuan pemisi tinggi manggai ba taun 2030.
“Terima kasih ketegal udah nyiri sereta pechayaka aku nyadi Pro Canselor UNIMAS.
“Ti seiti basa ke besai ari perintah Nengeri enggau Besai kelebih agi ari Opis menteri Pelajar Tinggi Malaysia,”ku Jabu.
Ngenang kaul bukai, Kadim madah UNUMAS deka ngadu Konvokesyen ke 21 berengkah 6 nyentuk ngagai 9 November 2017.
Ba konvokesyen serak tu ku Kadim, UNIMAS deka ngangkatka Abang Johari nyadi Pro-Canselor ke baru nganti penuduk puang ti ditinggalka Niang Pehin Sri Adenan Satem.
“Konvoksyen serak tu ngerami 4,120 iku graduan iya nya 3,676 graduet ijazah sarjana muda lalu 444 iku graduet ‘pascasiswazah,’ku Kadim.
Sidang keterubah Konvokesyen ke 21 UNIMAs deka dipenyadi Tun Pehin Sri Taib di Arena Gemilang, DeTAR PUTRA.
Bela nyempulang penemuai nya Sapit Mandal Canselor Profesor Mohd Fadzil Abdul Rahman, Pengerijista UNIMAS Henry Tening Sengeng enggau Diretor Canselori seerta Opis Kaul Antarabangsa Profesor Madya Dr. Abang Ekhsan Abang Othman.