HOTS patut dikemeran ba raban nembiak sekula: Manyin
KOTA SAMARAHAN: ‘ Higher Order Thinking Skills’ (HOTS) patut digaga nyadi adat dulu, baru ulih ngeriri diri empu nemu berunding chara (HOTS), enti pengawa belajar chara HOT nya udah nyadi adat, ku Menteri Pelajar, Sains enggau Pansik Teknologi, Dato Sri Michael Manyin anak Jawong.
Apai indai ku iya, anang kelalu majakka bala pengajar ngajar anak sida ba pekara akademik aja tang patut ngeriri sida landik berunding panjai sereta tinggi agi.
“Sekula sigi lebih nguing ngagai pekara akademik laban apai indai deka meda pengajar ngajar anak sida ngabika bulih pemutus peresa ke manah.
“Industri pan baka nya, deka meda nembiak ke minta pengawa ba sida iya teulihka pemutus peresa ke manah ngambika ulih diambi gawa, tang enda betati sekalika nembiak nya ulih berunding enggau manah tauka enda,” ku Manyin.
Iya madah munyi nya lebuh dikerandau pengudah bejadi National Conference on Thinking Culture (NCTC) 2017 ke ditur ba Institut Pematih Pengajar Kampus Tun Abdul Razak, ditu ensanus.
Ku iya baru, enti aku pengajar ti enda ulih meri pemutus peresa ke manah, apai indaideka nyalahka sekula lalu sida deka nanya, nama kebuah sekula tu baka nya.
“Semua pengajar, kepala pengajar nguji enggau naka ulih meri pemutus peresa ke pemadu manah. Tetiap kali kitai meda tauka mendingka, berapa iku nembiak ke ngambi peresa SPM tauka STPM bulih semua A? Sidanadai kala nanya berapa iku nembiak ke udah nyadi nembiak ke nyulut ke ngembuan personaliti ti manah,” tanya iya.
Ba sekeda menua ku iya, baka di Finland, nembiak sekula di menua nya semina ngambi peresa sekali aja, iya nya maya umur nembiak manggai 16 taun, lalu sebedau nya sida nadai kala beperesa.
“Di menua Jepun, ba sekula primari bala nembiak diberi latih ke chukup laban sidadiajar bebasaka orang bukai, tauka diri sebilik. Nya alai, nya kebuah orang Jepun agi ulih ngangkat sereta ngetanka adat asal sida iya nyentuk ke sehari tu, lalu nadai sekali dikeruga adat ari menua barat.
Taja pia ku Manyin, perintah nengeri nadai kuasa ngubah adat ke baka tu basekula di menua tang, tang atas kuasa bala pengajar, kepala pegajar, sida iya ulih madah ngagai Opis Menteri Pelajar.
“Perintah nengeri nadai kuasa atas pelajar laban nya dipegai Perintah Besai. Tang taja pia, pemanah meri bekaul enggau HOT, laban enti nadai orang munyi, nadai mih orang ngenataika sada kita ngagai perintah,” ku iya.