Rumah sembiang di DUN Engkilili bela dibantu
Semua piak patut ngasaika pemansang infrastruktur nyengkaum gerija, chapel, tepikong enggau masjid
KUCHING: Kaban Kunsil Nengeri (ADUN) Engkilili Dr Johnical Rayong Ngipa madah pengagit diri bekaul enggau pemansang gerija enggau chapel ba sitak konstituensyen iya.
Nitihku iya, semua piak patut ngasaika pangka pemansang lebih agi ba DUN Engkilili sekalika nya pemansang infrastruktur tauka rumah-rumah sembiang nyengkaum gerija, chapel, tepikong enggau masjid.
“Ba aku semua rayat ditu patut ngasaika pengelantang baruh pegai Barisan Nasional (BN) lalu aku ke nyadi pengari perintah naka ulih ngamatka peminta nitih belanja ke diberi nengah Geran Projek Pemansang Menua Pesisir (MRP) sereta Program Transformasyen Menua Pesi- sir (RTP),” ku iya.
Iya madah munyi nya rambau bejadika pengerami Merarau begulai enggau Bishop The Right Revd. Danald Jute di Parish Hall Gerija St. Michael, Engkilili ensanus.
Ku iya, sekumbang udah nyadi pengari rayat iya naka ulih mantu semua rumah sembiang lalu nadai siti pan dikemelu laban nya raban pengarap ba DUN tu.
“Juluk nya udah dalam ati sebedau aku nyadi pengari rayat lalu pengawa badas nya berengkah maya aku gawa nyadi doktor ba Sarikei... bukti iya bil karan enggau ai ba sebengkah chapel ba Bin- tangor agi mengkang nama aku,” ku iya.
Tambah mega, nama aja pengawa ke digaga patut dikereja enggau bebendar, nadai minta balas sereta enda nemu leju lebih agi dalam ngerembaika pengawa Tuhan.
“Endang misyen enggau visuen aku deka meda semua rumah sembiang ba DUN tu enggau di nengeri tu mansang ngerembai lalu semua orang nyengkaum pengari rayat sereta piak ke bepemisi besaup meri bantu dikena ngemansang, nangkir sereta nempa rumah Tuhan lebih manah dipeda,” ku iya.
Dulu ari nya, Bishop Danald lebuh ke bejaku meri pengaga ati ngagai Dr Rayong laban ke udah nyaup meri belanja ke chukup mayuh ngagai semua gerija enggau chapel ba DUN tu.
“Ukai agi resia iya nya nuan (Dr Rayong) enda kala enda ingat ngungkupka belanja ngagai semua rumah sembiang ba DUN tu nyengkaum tepikong enggau masjid... pengawa ke chukup badas lalu arapka Tuhan merekatka semua pengawa nuan,” ku iya.
“Kitai patut nemu belanja ngaga rumah sembiang chukup besai lalu pemeri ari kaban gerija sereta chapel enda chukup, nya alai pemeri ari mensia mayuh enggau bala pengari rayat sigi dikearap,” ku iya seraya madah arapka lebih mayuh pengari rayat neladan pemanah ulah ADUN Engkilili tu.
Sebedau nutup jaku, Dr Rayong bisi ngungkupka belanja RM300,000 dikena ngaga palan paking kerita, (RM200,000) ngaga kabinet dapur sereta masang irkon ba Gerija St. Michael lalu belanja nya deka diberi taun baru.
Nambahka nya, iya nyendiaka belanja dikena meli perengka muzik ngagai gerija nya enggau penyampau RM10,000, Kaban Komiti GerijataukaPCC(RM10,000), Biro Indu (RM10,000) sereta Biro Nembiak bela nerima RM5,000. Udah nya, Chapel Ensurai, Batang Ai diagihka belanja RM100,000 dikena ngemanahka chapel nya.
Sama bisi datai Rev. Peter Augustine, Archdeacon Chimbie Bunsi, Rev ari Lubuk Antu, Betong enggau Pantu, penghulu Gerang Anchih, Penghulu Nyambong Maweng, kaunsilor enggau bala tuai rumah ke besemak.
Ba aku semua rayat ditu patut ngasaika pengelantang baruh pegai Barisan Nasional (BN) lalu aku ke nyadi pengari perintah naka ulih ngamatka peminta nitih belanja ke diberi nengah Geran Projek Pemansang Menua Pesisir (MRP) sereta Program Transformasyen Menua Pesisir (RTP). Dr Johnical Rayong Ngipa ADUN Engkilili