Apai indai meseti puh ngajar anak di rumah
BINTULU: Kaban Kunsil Nengeri (ADUN) Samalaju, Majang Renggi ngansak apai indai seruran ngelimpangka jam enggau pengepuh nyendiaka pelajar ti menyana ngagai bala anak diri.
“Ba pengawa kitai nuju penegap ba pemansang, kitai deka napi mayuh macham pemar ngiring rebak dudi hari kelebih agi pemar dalam pelajar.
“Tang diatu kitai enda patut anang lari ari pemar lalu apai indai meseti neruska pengepuh sida ba pelajar bala anak ukai semina di sekula aja, tang mega di rumah,” ku iya rambau Pengerami Graduasyen Pom Lima enggau Pom Enam Sekula Sekondari (SMK) apin lama ke udah.
Ku iya, beguna endar bala apai indai bejalaika pangku pengawa sida ngajar di rumah, nampung ajar bala pengajar di sekula.
“Kitai nyadi apai indai meseti ngelimpangka jam diri sereta belanja mega dikena nempa modal mensia rebak dudi ti deka gawaka bansa kitai.
“Apai indai meseti besaup enggau sekula ngasilka modal mensia ti bisi kualiti ti deka megai tanggungpengawa ngetuaika menua tu ngagai tikas tinggi agi dudi hari,” ku Majang.
Ba lansa bukai, iya ngingatka bala nembiak terus beratka pengawa nyendiaka diri napi peresa Sijil Pelajaran Malaysia (SPM) enggau Sijil Tinggi Pelajaran Malaysia (STPM) dalam bulan November.
Nitih ku iya, teulihka pemutus ti nyulut dalam kededua peresa nya beguna endar ngagai sida nampung pelajar ngagai tikas tinggi.
“Semina sida ti pas aja deka diterima nampung pelajar ngagai universiti tauka kolej lalu bisi beribu iku ti minta,” ku iya.