Polis Bintulu mujur nangkap tiga saspek nyerungkai rumah
BINTULU: Tiga lelaki peranak menua tu dipelaba bekaul enggau kes nyerungkai rumah udah ditangkap raban Opis Pemansik Penyalah ( JSJ) Bintulu ditu tumu pagi kemari.
Ketuai Polis Pelilih Bintulu Superitenden Zulkipli Suhaili madah, sida mujur nangkap urung pukul 2 pagi ensanus maya tiga saspek ke beumur urung 20 taun bejalai ba pasar lama Sungai Plan, enda jauh ari flat Sungai Paln Tanjung Kidurong.
Ku iya, pengawa nangkap nya mega asil penerang asil siku orang ke ngaga ripot urung pukul 10.29 malam, beberapa jam sebedau sida datai ngenyit.
“Bela dirampas iya nya tiga unit telefon binching, siti pemain DVD, perengka remote kontrol engga siti perengka pengempat,” ku iya nengah sebengkah penerang ditu kemari.
Berindik ari nya ku iya, kes dipansik nitihka Seksyen 457 Kanun Keseksaan.
Udah nya ba kes kedua, polis Bintulu mujur nangkap dua nembiak lelaki peranak menua tu ba Kampung Baru ditu urung pukul 12.05 tengah malam ensanus pengudah nerima ripot pasal sebuah kedai renchit kena serungkai.
Ku iya, orang ke ngaga ripot nemu kedai iya kena se- rungkap urung pukul 4 pagi 1 November lalu tepedaka barang pemakai enggau perengka mesin ayam lenyau nyengkaum rugi RM550.
Nya alai, ku iya kes nya deka dipansik nitihka Seksyen 457 Kanun Keseksaan. BINTULU: Nembiak rebak diatu chukup betuah laban bisi peluang besai sereta muntang bulih pelajar ke bekualiti nengah mayuh chara enggau penerang ke bekaul enggau nadai tatak.
Pemesai Opis Pelajar Pelilih Bintulu, Fred Entau madah, nembiak rebak diatu mega chukup muntang ngulihka penemu enggau nadai tatak ambika banding nengah internet.
“Belajar diatu majak muntang laban pengawa ngulihka penemu nadai ditatak ukai semina nengah macha bup aja.
“Sistem pelajar ba menua tu diatu majak maju dibanding enggau jeman sebedau tu laban pengajar diatu dilatih enggau manah kelimpah bisi tikas pelajar ke tinggi,” ku iya.
Iya madah munyi nya rambau Pengerami Anugerah Nembiak Nyulut Sekula Sekondari (SMK) Baru Bintulu ba Dewan Suarah kemari.
Ku iya, taja sehari tu nadai ngasai nama utai diasai orang ke suba tang kitai tetap ulih mujur laban kitai bebendar nama utai dikemisi maya nya.
Iya madah, jam tetao bejalai, pia mega pelajar begunaka nembiak sedia berubah ari sukut fizikal enggau psikologi.
“Pengelandik, kreativiti, pemintar berunding ba tikas tinggi nyengkaum pengelandik bedagang entara pekara ke patut dipelajar,” ku iya.
Kelimpah nya, Fred ngelalau bala apai indai ngambika seruran matau aktiviti anaksereta patut bejalaika tanggungpengawa dalam ngajar sida maya ba rumah.
Ku iya, apai indai enda patut semina ngelempaika tanggungpengawa sida ngagai bahu pengajar aja maya ba sekula tang patut meri peransang ngagai anak maya ba rumah.
“Pemujur nembiak asil ari pengepuh kededua piak iya nya pengajar enggau apai indai,” ku iya.
Sama bisi datai, Prinsipal SMK Baru, Rohani Daud; chairman program Abdul Rahman Katiran, pengajar kanan, ketuai raban bansa enggau bala apai indai.