MA63 entara usul deka dibantai ba Aum DUN
Usul tu ila dibantaika Datuk Amar Douglas Uggah lalu deka disukung Dr James Masing
KUCHING: Usul pasal Sempekat Malaysia 1963 (MA63) deka dibantai sereta dipejuraika nyerumba Aum Kunsil Nengeri (DUN) ti berengkah 8 ngagai 17 November tu.
Dalam aum pengarang berita kemari, Speaker Kunsil Nengeri (DUN) Datuk Amar Mohd Asfia Awang Nassar madahka usul nya deka dibantaika Sapit Kepala Menteri Datuk Amar Douglas Uggah Embas sereta deka disukung Sapit Kepala Menteri Tan Sri Datuk Amar Dr James Jemut Masing.
Iya madahka usul nya dibantaika berindik ari pengudah penemuai tim undangundang Sarawak ke London ti mansik dokumen beguna pasal MA63.
“Taja pia aku nadai penerang silik pasal usul nya, tang nya berindik ari pengudah penemuai ke London apin lama.
“Lalu tu begunaka enggau lengkas sukung ari DUN pasal hak Sarawak baka Akta Laut Wilayah enggau ke bukai,” ku iya.
Iya mansutka pekara nya dalam aum pengarang berita pengudah ngulu Pra-Aum DUN ti bechairman Kepala Menteri Datuk Patinggi Abang Johari Tun Openg, ke diatur ba Indu Opis PBB ditu.
Nambahka nya ba aum DUN ke sekali tu mega deka bisi empat rang undang-undang deka dibantai nyengkaum Kepala Menteri; Menteri Wang Kedua Dato Sri Wong Soon Koh; Menteri Pelajar, Sains enggau Pemansik Teknologi Dato Sri Michael Manyin Jawong enggau Sapit Kepala Menteri Datuk Amar Awang Tengah Ali Hassan.
“Bisi empat rang undangundang dibantaika ba aum ke sekali tu lalu keterubah iya nya Rang Undang-undang Bekalan (2018), 2017 dibantaika Kepala Menteri Datuk Patinggi Abang Johari Tun Openg.
“Menteri Wang Kedua Dato Sri Wong Soon Koh deka mantaika Rang Undangundang Sarawak Multimedia Authority, 2017 sereta Rang Undang-undang Majlis Pembangunan dan Penyelidikan Sarawak, 2017 dibantaika Dato Sri Michael Manyin.
“Lalu rang undang-undang keempat dibantaika Sapit Kepala Menteri Datuk Amar Awang Tengah Ali Hassan ti mantaika Rang Undang-undang Lembaga Pembangunan Koridor Wilayah (Ubah).
“Rang Undang- undang Sarawak Multimedia Authority enggau Rang Undangundang Majlis Pembangunan dan Penyelidikan Sarawak iya nya rang undang-undang baru,” ku iya.
Nitihku iya bacha keterubah enggau kedua Rang Undang-undang Bekalan (2018), 2017 kena 8 November lalu bacha kali ketiga kena 17 November.
Rang Undang- undang Sarawak Multimedai Authority deka dibacha kali keterubah, kedua enggau ketiga kena 8 November.
Rang Undang- undang Majlis Pembangunan dan Penyelidikan Sarawak deka dibacha kali keterubah enggau kedua kena 8 November sereta bacha kali ketiga kena 9 November.
Nambahka nya ku iya, Rang Undang-undang Pembangunan Koridor Wilayah (Pindaan), 2017 dibacha kali keterubah enggau kedua kena 8 November sereta bacha kali ketiga 9 November.
Kelimpah ari nya, DUN bisi nerima semilan usul ari penyakal iya nya ari Baru Bian (PKR-Ba’Kelalan) pasal Pemakai Menua enggau Pulau Galau; dua usul ari David Wong (DAP-Pelawan) sereta tiga usul ari Dr Ting Tiong Choon (DAP-Pujut).
Chong Chieng Jen (DAPKota Sentosa), Irene Chang (DAP-Bukit Asek) enggau See Chee How (PKR-Batu Lintang) sama bela mantaika siti usul ba aum DUN ke sekali tu.
Bisi 326 tanya lisan dianjung 49 iku kaban DUN enggai 77 iti tanya betulis diterima ari 10 kaban DUN.
Nyerumba aum DUN (8 ngagai 17 November) pengawa milih senator deka diatur kena 9 November dikena nganti Senator Datuk Lihan Jok sereta bejadika setem baru DUN nyerumba pengerami 150 taun DUN ke deka dipenyadika Kepala Menteri ba Autriom Kompleks DUN pengudah macha bajet.
Lalu tu begunaka enggau lengkas sukung ari DUN pasal hak Sarawak baka Akta Laut Wilayah enggau ke bukai. Datuk Amar Mohd Asfia Awang Nassar Speaker DUN Sarawak