Ekonomi Bumiputera agi jauh tinggal, patut dikemansang
MIRI: Perintah patut beratika silik agi pengawa ngemansangka ekonomi Bumiputera di nengeri tu berindik ari raban nya agi jauh tinggal.
Kaban Parlimen ( MP) Sibuti, Datuk Ahmad Lai Bujang ngaku bisi takah berupai endar bekaul enggau pemujur raban bumiputera di Semenanjung enti dibanding enggau Sarawak.
“Aktiviti dagang suah agi dikaul enggau indu Iban di pasar tamu, taja pia, penemu sida agi rapas senentang chara ngulihka bantu belanja,” ku iya rambau bejuraika Bajet 2018 di Dewan Rakyat, Hari Empat tu tadi.
Ku iya nambah, agi bisi pengurang ba penyereta peranak asal Sarawak ba pengawa dagang sektor industri mit dibanding enggau raban bumiputera di Semenanjung.
Ku iya, raban Bumiputera din ngasaika mayuh macham bantu ari perintah dikena ngerembaika rentayan dagang sida.
Berindik ari nya ku iya, perintah patut beratika silik agi pengawa ngangkatka ekonomi bansa Iban, Orang Ulu, Melanau sereta Melayu Sarawak.
Ahmad Lai mega nadai meda nyata agih belanja dikena ngemunaska dadah berindik ari penanggul nya majak ngelekai ngagai kandang menua pesisir.
“Dikena nyapai aspirasyen Transformasi Nasional (TN50), aku beratika menua tu patut bisi penuai ba runding dalam pengidup rama sereta nadai agi napi penanggul ari dadah,” ku iya.
Nangkan nya ku iya, sambung jalai tama ngagai genturung pendiau udah meri jalai ngagai sida ti bejualka dadah nyual ngagai bala nembiak dia.
Tambah mega, asil betanam betupi baka sawit mega suah dichuri bala ti gian dadah, ngiga duit bebelika dadah ari sida ke nyual.
Berindik ari nya, Opis Menteri Nembiak enggau Lumba patut ngira chara dikena ngemunaska dadah sereta ngena agih belanja Bajet 2018 ungkup tuju nya,” ku iya.
Iya mega ngelaluka pengawa ngambika perintah ulih ngenyampatka pengawa bebelika kereban nyaga pengelikun kelebih agi kapal peronda lalu dianjung nyaga kandang tasik Sarawak.
“Enggau pemisi kapal peronda tu, raban orang berikan di kandang menua dipegai aku badu agi irau meda penatai Kapal Pengawal Pantai China di kandang tasik menua,” tandu iya nyemetak.
Dato Sri Richard Riot Jaem Menteri Penguasa Pemayuh Pengereja Pengawa
Naka ke diatu ku iya, ikas nya udah manggai ba 31 peratus ke alai perintah udah nusun mayuh program enggau tuju nyapai juluk ke ditetap.
“Kitai bisi timpuh dua taun agi lalu aku pechaya tagit 35 peratus pengereja pengawa bepengelandik tinggi deka dijapai,” ku Riot.
Iya mansutka jaku nya rambau bejadi Konvokesyen Sistem Latih Dual Nasional (SLDN) Ke-3 ke diatur di Kampung Budaya Sarawak ditu, kemari.
Iya nambah nengah Bajet 2018 ke dibantai Menteri Besai bedau lama tu tadi, agih belanja penyampau RM4.9 bilion udah disedia dikena ngemujur Pelin Besai Latih Teknikel enggau Vokesyenal (TVET) Malaysia.
“Perintah mega nyendia 100 skularship ungkup pelajar ke nyulut nengah agih belanja RM4.5 juta.
“Tu dikena meransang sida ke udah nembuka TVET nampung pelajar ngagai ikas ke tinggi agi,” ku iya.
Ngenang kaul ke sama, Riot nambah nengah Atur Pemansang Malaysia Lumpar Ke-11 (RMK11), 3.3 juta pengawa puang udah ditempa.
Ari penyampau nya ku iya, 60 peratus begunaka pengereja pengawa bepengelandik tinggi iya nya sida ke ngembuan setipikit TVET.
Ba konvokesyen kemari, 176 iku orang nerima setipikit Pengelandik Malaysia (SKM) ke disedia nengah SLDN ke diperabung Opis Pemansang Pengelandik(JPK).
Bela datai Chairman Gempung Pemansang Ekonomi Sarawak( SEDC) Tan Sri Datuk Amar Abdul Aziz Husain, Direktor Pemantau Projek (JPK) Dr. Mohamad Sulaiman enggat Direktor JPK Sarawak Zaid Mat San.