Program Outreach Petronas di Pelagus patut ditunda piak bukai
KAPIT: Kaban Kunsil Nengeri (ADUN) Pelagus, Wilson Nyabong Ijang meri puji ngagai Program Outreach Petronas ti keterubah bejalaika Tanggungpengawa Rama Korporat (CSR) sida di sitak nya dikena ngemanah sereta ngangkatka perengka guna pemun enggau infrastruktur di Sekula Primari (SK) Ulu Pelagus.
Ku iya, ninting taun Petronas endang bisi bejalaika program outreach sida empu, tebal agi di kandang menua Bintulu enggau Tatau, endur sida gawa. Diatu sida udah ngerembai ngagai menua ke bukai, datai ngagai Pelagus.
“Meri terima kasih besai ngagai Petronas. Kala nyadi pekereja (sebedau dipadu nyadi Sekretari Kepala Menteri Sarawak), sida udah milih kandang menua Pelagus, Aku chukup gaga ati.
“Sida milih SK Ulu Pelagus. Penyampau belanja dikena bejalaika program manggai RM1.35 juta ungkup CSR, meri pulai ngagai komuniti. Sida milih sekula menua pesisir laban Petronas meretika pemesai guna pelajar dikena ngangkatka tikas pengidup dudi hari,” ku Nyabong.
Iya ngarapka agi bisi piak bukai deka nunda pemanah pengawa Petronas meri pulai ngagai bala komuniti nengah program CSR sida. Kitai deka nganjung peminta ngambika meri bantu ngagai sekula ti begunaka penyikap perengka pemun enggau infrastruktur dikemanah ngambika dipeda meruan agi.
“Taja sekula tu jauh di menua ulu di Kapit, tang sida (Petronas) enggau kunteriktor sida bisi datai kitu mantu kitai ngemanahka infrastruktur sekula menua pesisir.
“Aku ngarapka Petronas deka bejalaika mayuh agi projek CSR dikena meransang pelajar ngagai nembiak bansa Dayak di kandang menua pesisir,” ku Nyabong nambah.
Antara perengka guna ke baru digaga ungkup sekula iya nya balai besai ( balai mayuh guna), ngaga lupak pejalai baru ngelawa rumah bemalam enggau lupak pejalai antara bilik kelas, agu baru di rumah bemalam sereta ke bukai ke beungkus RM1.35 juta.
Bisi lapan piak ti bekunsika pengawa CSR Petronas di SK Ulu Pelagus iya nya Air-Marine Freight Services Sdn Bhd, Dayang Enterprise Sdn Bhd, Hyerwave Systems and Engineering Sdn Bhd, Kemudi Harta Sdn Bhd, KUMUS Sdn Bhd, KPG Engineering Sdn Bhd, Rahabco Enginnering enggau Construction Sdn Bhd and PTT Corporation Sdn Bhd.
Nyabong meri terima kasih ngagai Ketuai Pemesai Eksekutif (CEO) Petronas LNG Sdn Bhd Malaysia Ir Pau Kiew Hua ti udah ngatur pejalai ngabas nama penyadi baka di menua pesisir.
Sapit Kepala Menteri Sarawak Tan Sri Datuk Amar Dr James Jemut Masing ke mega Menteri Pemansang Infrastruktur enggau Perengka Pengangkut bejadika pengawa sehari nya.
CEO Malaysia LNG Sdn Bhd Pau Kiew Hua, ADUN Krian Ali Biju, Pemesai Pelajar Kapit Ringgit Gawan, Pemesai Pelilih Kapit Elvis Didit, Pemesai Pengatur Pengawa Khas Masing Robert Liman, sekeda bala ke bisi datai.
Bisi 14 iku pengajar SK Ulu Pelagus, lapas iku staf enggau 50 iku nembiak.