Semua kes pechara tanah NCR patut diketu dulu
JULAU: Kaban Parlimen Julau Datuk Joseph Salang Gandum kemari merambu ngasuh perintah nengeri Sarawak nangguhka semua apil tauka kes pechara bekaul tanah Adat Bansa Asal (NCR) ke agi nganti dipechara.
Iya minta kes kort diketu dulu nyentuk ubah baru ba Kanun Tanah Nengeri bekaul tanah nya dikemendarka Kunsil Nengeri (DUN), dikearap bulan Mei taun baru.
“Tu dikena ngelai penyiru piak perintah nengeri ngagai orang ke beempu tanah,” ku iya madah ngagai Bernama.
Salang madah, iya ngemansutka penemu bepelasarka tanggungpengawa iya ti nyadi kaban Parlimen tauka pengari rayat lalu ukai nyadi kaban komiti khas nengeri ke ditumbuh mutarka mayuh isu bekaul enggau tanah NCR.
Komiti nya betuaika Sapit Kepala Menteri Datuk Amar Douglas Uggah Embas, ke mega Menteri Betanam Betupi Moden, Tanah Adat enggau Pemansang Kandang Menua Sarawak.
Salang mega ngelansa, isu bekaul reti pemakai menua (rizab komunal) enggau pulau galau ari mayuh bengkah komuniti asal nyengkaum Penan ngujungka perambu ubah nya saru.
“Ukai muntang baka ke diperagam kami terubah iya. Pengudah berandau sereta pansik dipejalaika Majlis Adat Istiadat Sarawak, kami tetemuka mayuh reti bekaul pemakai menua enggau pulau galau.
“Komuniti ti bebida mega ngembuan reti ke enda sebaka. Tambah mega iya bebida ba endur taja diuan komuniti ke sebaka.
“Ambika banding, komuniti Iban ba menua baka di Betong, Lubok Antu, Saribas, Julau tauka Kapit ngembuan reti ba sida empu,” ku Salang ke mega Sekretari Besai Parti Rakyat Sarawak (PRS).
Ku iya ungkup tuju ubah nya, patut bisi reti standard lalu tu benung diaduka raban komiti.
Nitihku iya, endang enda manding enti nempa peragam ngumbai komiti enda bebendar tauka ngelubahka pekara tu. — Bernama