Pemesai rampa menua kandang tebing tasik Tusan dijaga nengah PKT
MIRI: Projek Komuniti Tusan (PKT) ti diatur apin lama ke udah di Pantai Tusan nyapai pemujur enggau lebih 200 iku pesereta ngelantangka ati ngayam pemanah rampa tebing tasik enggau mata panas niki serayaka begulai enggau pangan diri.
Diatur Rotary Club, Mengeri Minyak Miri, lalu disukung lebih 20 bengkah ejensi peribit enggau perintah sereta mega gempung, program sehari nyentuk ngemeratka pekara servis komuniti enggau ngintu pengelantang sida ti kurang benasit.
Nitih ku Sekretari Kelab, Leslie Lau, ke amat, tiga aktiviti di baruh Projek Komuniti Tusan ngemeratka tiga tuju ti bebida.
“Program dipungkal enggau pengawa beripai meresi tebing tasik Tusan ke alai semua pesereta deka dibai ngagai tebing tasik ngumpul uras ke bisi dibuai ba dia.
“Kami andal amat aktiviti mantu meri penyedar ba pemesai guna nyaga pemeresi rampa menua, kelebih agi ngagai bala pesereta nembiak, ti mantu ngajar bala nembiak enggau sida ke besai tuai pasal pengawa nyaga pemeresi kandang ngelingi.”
Lau nyemetak madah nyadi palan ti mayuh narit penatai di Miri, pengudah penyadi ai mata biru ti tebilang, palan tu endang patut diintu memanah sereta diangkatmanah.
“Mayuh orang datai kitu maya ujung minggu, ngelantangka ati sereta ngayam pemanah rampa menua. Taja pia, tanah tusur ngujungka bukit tebiang lalu tau ngeruga pengelikun bala pengusung.
“Nya kebuah, kami udah ngaul baka arkitek enggau injinir ari sektor peribit, ti bisi ati ngangkatka Pantai Tusan enggau mantaika peminta ngagai Kaunsil Pelilih Subis ba keretas kereja ngemanah ti meruan,” ku Lau.
Pengudah tembu meresi kandang tebing tasik, bala pesereta ke mega ngaum 44 iku anak patut balu ari Hamidah Orphanage Complex (Peryatim) diberi awak bemain enggau merarau di Tim’s Seaside Hideout.
“Kami berasai lantang laban bala anak patut balu ngelantangka diri empu baka kami mega, sereta meri terima kasih ngagai sukung ari sida ti melanja program tu, ngemujurka iya.”
Ku Lau nambah, Projek Komuniti Tusan nyadi program komuniti diatur begulai ti keterubah enggau projek kemanusiaan ti meransang servis komuniti enggau kemanusiaan.
“Juluk kami ngambika bala anak patut balu ulih ngasaika peneleba sereta begulai dalam komuniti. Ngemai sida belepa enggau ruang bilik, meri kenang chukup manis ngagai sida.
“Taja nyangka iya begunaka awak enggau belanja besai merambu projek tu, abis nadai kitai nemu, kitai ulih ngaga pengawa ungkup sida, nemu sida nadai ulih suah ngasaika pekara tu,” ku Lau.
Lau meri terima kasih iya ngagai semua piak ti melanja baka Hotel Parkcity Everly, Tim’s Seaside Hideout sereta mega sektor peribit ti melanja makai, perengka pengangkut, main enggau aktiviti ungkup semua pesereta.
“Berindik ari timbal chukup manah ari bala pesereta, kami tentu deka ngambi projek tu nyadi projek timpuh panjai kami lalu sebedau kami neruska iya, enggau ngelaungka belanja dikena melanja bala anak patu balu sereta mantu sida seraya ngangkatka sida ba mayuh bengkah pengawa ti menyana.”