RM1b ungkup ngemanahka sekula lama di S’wak
Bajet ti diberi tu kelai pengiruh perintah besai ti deka ngemanahka infrastruktur di selampur nengeri tu
KUCHING: Agih belanja RM1 bilion nengah Bajet 2018 mandangka pengiruh perintah besai mutarka isu sekula ke udah jai di Sarawak, ku Sapit Menteri Besai Datuk Seri Dr Ahmad Zahid Hamidi.
Ku iya, tajapan Sarawak dulu agi ari nya deka nguna duit ari Bank Pemansang Sarawak (DBOS), Menteri Besai Datuk Seri Najib Tun Razak setuju ngagihka belanja ngambika enda ngena duit ari DBOS.
“Aku udah dulu berandau enggau Kepala Menteri Datuk Patinggi Abang Johari Tun Openg sentang pengeran mutarka isu sekula ke udah jai.
“Maya aku ngenataika asil randau nya, Menteri Besai madah nya pinta ke pintar ti datai ari runding raban ketuai Perintah Nengeri,” ku iya.
Zahid mansutka jaku nya ba Program Ekspresi Negaraku ti diatur di Laman Pengerami, Petra Jaya ditu, kemari.
Aku udah dulu berandau enggau Kepala Menteri Datuk Patinggi Abang Johari Tun Openg sentang pengeran mutarka isu sekula ke udah jai. Datuk Seri Dr Ahmad Zahid Hamidi Sapit Menteri Besai
Pengerami nya bela digulu Kepala Menteri Datuk Patinggi Abang Johari Tun Openg.
Zahid nambah, Menteri Besai udah nya meri timpuh 2 minggu ngagai Majlis Tindakan Ekonomi bejalaika pansik sentang pinta nya lalu dalam timpuh ke pandak agih belanja nya disedia.
“Kati tau pinta ari Abang Johari ke sigat gamal ditulak, aku enda mikir Abang Johari bisi puchau ti ngasuh pinta nya dikemendar.
“Tang ketegal idea ari ketuai ti sigi lurus deka ngemansangka nengeri, Menteri Besai setuju enggau idea nya,” ku Zahid nambah.
Beribu iku orang datai ngulu Program Ekspresiku Negaraku berengkah jam 6 pagi.
Entara program ke disedia iya nya Larian Bendera Negaraku, senamrobik, bekelala enggau ikon Negaraku enggau panggau pemerindang.
Tiga puluh bansal diarika mayuh bengkah ijinsi perintah bisi mega dibuka ngagai mensia mayuh.
Bela datai Sapit Kepala Menteri Datuk Amar Douglas Uggah, Sekretari Perintah Nengeri Tan Sri Datuk Amar Morshidi Abdul Ghani, Menteri ba Opis Menteri Besai Datuk Joseph Entulu enggau orang bukai.