Penanggul dokumen pengelala di Sarawak meseti diputar enggau lengkas
KUCHING: Sapit Menteri Besai Datuk Seri Ahmad Zahid Hamidi madah enti agi bisi rayat Sarawak (ke patut bisi kad pengelala enggau surat beranak) ke lalu bedau bulih kad pengelala, penanggul nya enda tau enda diputarka, taja pan udah 1 Disember, ku iya.
“Aku udah ngasuh Sapit Menteri aku (Datuk Masir Kujat) begulai enggau Direktor Opis Pengerejista Bansa Sarawak (JPNS) ngemutarka penanggul tu taja pan udah 1 Disember.
“Kami bisi pemerat, penanggul tu enda tau enda diputarka, pengabis laun pan dalam bulan September 2018. Perintah betatika pekara tu laban kes tu udah kelalu lama, ngujungka bala nembiak ke ada di Sarawak tang nadai dokumen enda ulih nyambung pelajar tauka ngiga pengawa ketegal nadai surat pengelala.
“Aku nemu Kepala Menteri Sarawak ( Datuk Patinggi Abang Johari Tun Openg) bisi udah ngasuh Menteri Pengelantang Pendiau, Orang Indu, Komuniti, Ruang Bilik enggau Pemansang Anak Mit, Dato Sri Fatimah Abdullahberatika pekara tu, nyengkaum niang ‘Tok Nan’ (Pehin Sri Patinggi Tan Sri Adenan Satem) kala nyebut pekara tu, lalu aku ngarapka Masir beratika pekara tu sereta ngeripot ngagai aku,” ku Ahmad Zahid.
Iya madah munyi nya ba aum media lebuh nemuai ngagai Indu Opis Polis Diraja Malaysia ( IPK) Kuching di Jalai Badaruddin ditu, kemari.
Sebedau nya, Ahmad Zahid ke dalam penemuai sehari iya ngagai Bandaraya Kuching kemari, bejadika atur pengawa ‘Aspirasiku, Negaraku’ di Stadium Negeri Sarawak, lalu ngalih hari kemari, diberi basa, meresa pengawa bebaris PDRM di Padang Kawad IPK sebedau betemu baum enggau tuai pemesai polis di Mess Pegawai ditu, kemari.
Ahmad Zahid ti mega mangku pengawa dalam Menua (KDN) madahka bisi sekeda peminta kad pengelala tauka dokumen udah diperesa, sereta dipansik ulih KDN, lalu dokumen tu enda tau enda dikemutar enggau jampat.
“Aku meri timpuh tauka haribulan dokumen tu enda tau enda dikemutarka (target date), iya nya barang peminta ke patut sereta nitihka semua dokumen sereta atur ngulihka kad pengelala enggau surat beranak, deka dikemutarka semua penanggul nya ba timpuh ke patut tauka sebedau 1 Disember tu.
“Aku udah madah ngagai direktor JPN Sarawak, ngasuh sida ‘petugas khas’ mutarka penanggul tu, lalu baka nya mega ‘petugas khas’ baruh pegai Menteri di Opis Menteri Besai, Datuk Joseph Entulu anak Belaun bejalaika pengawa netapka di sitak menua pesisir ba komuniti Iban enggau Penan, ke lalu bedau bulih kad pengelala, ngemutarka penanggul tu enggau jampat,” ku iya, llau nandu baru ngasuh Masir meri ripot pasal pekara nya ngagai iya.
Sama bisi enggau ngulu aum media nya kemari, Sapit Kepala Menteri Datuk Amar Douglas Uggah anak Embas, Sapit Menteri KDN Datuk Masir Kujat enggau Sapit Kepala Polis, Datuk Pahlawan Mohd Dzuraidi Ibrahim.