IPTA enggau IPTS diperansang ngatur program servis ungkup komuniti

KUCHING: Palan pelajar tinggi (IPT) perintah enggau peribit di nengeri tu diperansang ngadu program servis ungkup komuniti tauka program ungkup raban graduet.

Menteri Dagang Temuai, Seni, Main Asal, Nembiak enggau Lumba, Datuk Abdul Karim Rahman Hamzah madah program ke bansa nya nyadi pelasar ke engkeman endur raban graduet meretika pengidup rayat kelebih agi sida ke diau di menua pesisir.

Ku iya, raban graduet ti ngaul diri ba program nya deka ngembuan penegap runding ti manah agi ari sida ke bukai.

“Pekara pelajar ukai semina sentang macha, nulis tauka nyepil tang bela mungkur sukut pengidup baka ke ngadu pengawa manah ngagai komuniti.

“Ketegal nya, kami ba renggat menteri sereta perintah deka seruran meri bantu enti bisi palan pelajar tinggi deka ngadu program ke baka nya.

“Engka sekeda ngasaika program tu mai penanggul, tang program tu tau ngasuh seseiku orang manah agi,” ku iya.

Iya mansutka jaku nya ba Konvokesyen Ke-14 Kolej Teknologi Sarawak (TCS) di Hotel Riverside Majestic ditu, kemari.

Ngenang sentang konvokesyen nya, Karim madah setipikit diploma tauka degree ke diterima bala graduet ukai setipikit ke tau nentuka kuing sida jemah ila.

Tang ku iya, setipikit nya deka mungkal pejalai pengidup raban graduet.

“Sehari tu, graduet univer- siti majak mayuh lalu kitai patut ngulihka pemandai ngagai ikas ke tinggi agi.

“TCS nempa mayuh pengereja pengawa ba makit kereja di nengeri tu ke alai graduet ari TCS patut temegah ketegal 98 peratus ari sida deka bulih batang pengawa dalam timpuh enam bulan pengudah tembu belajar,’ku iya.

Bela datai CEO TCS, Azri Nor Abdul Rahman, Chairman TCS, Nik Aznizan Hussein, enggau Konsultan TCS Dr Mohamad Pedro Barbeito.