Komuniti Bidayuh napi pemar pemansang dunya industri 4.0
MIRI: Nadai pengelandik enggau penemu mar endar rebak baru Bidayuh napi pemar ubah dalam dunya industri keempat ti nyadi di serata dunya kemaya hari.
Menteri Pelajar, Sains enggau Pansik Teknologi, Dato Sri Michael Manyin Jawong irauka raban nembiak Bidayuh napi penanggul nadai kereja laban enda tetangkupka peminta dalam industri.
“Pemar abad 21 deka majak mar. Diatu ubah kedua industri iya nya 2.0 dibanding enggau menua bukai dalam industri 4.0.
“Kitai nadai pilih. Ka tauka enggai. Kitai enda ulih diau ba tikas 3.0 tang terus ngagai 4.0. Nya kebuah, kitai patut kereja 100 kali lipat dikena kitai nyediaka diri napi pemar industri 4.0.
“Ke diatu, barang sapa nadai pengelandik, nadai bulih kereja,” ku iya nyemetak.
Berindik ari nya, iya minta apai indai ngemeratka pelajar bala anak dikena nyediaka sida tumu napi pemar ti begunaka rebak bepengelandik tinggi.
Iya mansutka jaku nya rambau bejadika Pengerami Makai Lemai Ngintu Genap Taun ke-40 Serakup Dayak Bidayuh Nasional (DBNA) Miri ditu kemari.
Berambaika jaku “Proud Past, Progressive Future”, pengerami udah digulu lebih 500 iku temuai ke datai ari bala kaban enggau bakih.
Ku Manyin, pengudah 62 taun, bansa Bidayuh napi mayuh ubah lalu ngasaika bemacham pemujur sebaka enggau bansa bukai.
Gaya bebida di jeman 50 an enggau 60 an laban agi mayuh bedau berani mindah enggau napi pemar pengidup di mengeri.
Rebak keterubah di mengeri mega napi penanggul nadai endur diau lalu nadai kaban belayan ti ngelala kelimpah ari napi ‘ubah gaya idup ti nyengit’.
“Aku suah meransang bansa Bidayuh di menua nyingkang ke mua enggau mindah ke mengeri. Sehari tu kitai berasai lantang agi laban bisi mayuh bakih.
“Anang semina diau di menua kita aja, laban kita enda deka nemu berubah. Pansut lalu napi pemar. Nya baru semengat orang Bidayuh,” ku iya nyemetak.
Ngelansa silik agi, bansa Bidayuh diatu temegah ati enggau bansa enggau jaku asal sida.
“Sebarang alai aku pegi, di Miri, Sibu, Sarikei, Kapit, Johor, Kota Kinabalu, nadai Bidayuh malu dikelala nyadi bansa Bidayuh. Tu mega ubah besai. Ketegal kitai udah berubah,” ku iya nerang.
Dulu agi ari nya, Chairman DBNA Miri, Kapten Bernard Idit mdaah, diatu bisi 5000 iku peranak Bidayuh diau mendam di Miri, tebal agi diau di Tudan, Permyjaya, Senadin, Lutong, Pujut, Taman Bumiko, Luak Bay, Ocean Park, Holiday Park, Taman Delight Airport, Riam, Taman Tunku, Taman Jelita, kampung Lusut sereta kampung Bidayuh
Bisi mega sekeda bansa Bidayuh diau mendam di Pelilih Subis enggau Marudi di Baram.
Pengerami nya mega ngemataka pengawa nyuaka insentif nembiak nyulut, 13 iku ba peresa SPM lalu siku STPM.
Setipikit mega bisi disua ngagai tujuh iku penerima diploma, enam iku degree, dua iku master degree lalu siku doktor falsafah dalam ‘pentadbiran perniagaan’.