Unifor mutarka konflik entara jalai pengarap
Penumbuh unit tu iya nya nyadi jematan entara gerempung jalai pengarap ukai Islam enggau perintah
KUCHING: Gerempung pengarap ukai Islam tau ngenatai pinta belanja ke dikena ngaga tauka ngangkatmanah rumah sembiang ngagai Unit Pekara Agama Bukai ( Unifor), iya nya seiti unit baru ke diperabung Opis Kepala Menteri.
Sapit Kepala Menteri Datuk Amar Douglas Uggah Embas madah unit nya ditumbuh kena 27 April taun tu asil buah runding kepala menteri ke dulu, Niang Tan Sri Adenan Satem.
Entara sekeda tanggungpengawa Unifor ku Uggah iya nya nyadi palan endur gerempung pengarap ngadu komunikasyen enggau perintah kelebih agi ba sentang pinta agih belanja ngambi tau dikena ngaga tauka ngangkatmanah rumah sembiang.
“Unit tu mega bejalaika pansik sereta mutarka konflik entara jalai pengarap,” ku Uggah ba pengerami Hari Patronal enggau Makai Lemai Ngempuru Belanja Gerija All Saints Tabuan Dayak ke diatur diseiti restoran ditu, malam ensanus.
Teks jaku Uggah dibacha Direktor Unifor Datu Dr Ngenang Janggu ti datai ngarika iya.
Uggah madah Sarawak chunto ke pemadu manah ba pemaik kaul entara pupu bansa enggau agama lalu meransang nembiak rebak baru ngenan pemaik kaul nya.
Ku iya, pemaik kaul enggau pengelantang meranka agama diri nya udah diperansang raban ketuai ke dulu nyengkaum Kepala Menteri Datuk Patinggi Abang Johari Tun Openg.
Nitihka penerang Uggah pinta Gerija All Saints ti deka ngangkatmanah ‘ parish hall’ sereta ngaga begunan ‘ parish’ benung diperunding Unifor nengah Bajet 2018.
Paderi Gerija All Saints Tabuan Dayak, Revd Bradley Sangan madah pengawa ngangkatmanah ‘parish hall’ begunaka belanja RM120,000 lalu pengawa ngaga begunan parish begunaka RM530,000.
Bla datai Chairman Pengatur Pengawa Maxwell Stephen Landong, Anglican Diocese of Kuching and Brunei Assistant Bishop Revd Aries Sumping Jingan, Sapit Sekretari Perintah Nengeri Datu Jaul Samion enggau orang bukai.
Unit tu mega bejalaika pansik sereta mutarka konflik entara jalai pengarap. Datuk Amar Douglas Uggah Embas Sapit Kepala Menteri