Perintah nengeri napi penanggul pengajar profesional dalam sekeda subjek: Salang
JULAU: Penekul perintah nengeri bejadi juluk ati 90:10 pengajar nengeri tu empu enti dibida enggau pengajar ari Semenanjung Malaysia ti diperambu deka dipenyadi taun seiti ukai reti dipuntanka naka nya tauka semaya perintah nya balang.
Chairman Opis Kaunsil Penyanding Penemu 1Malaysia Sarawak Datuk Joseph Salang Gandung madah, pekara nya nyadi bepun ari penyuntuk beberapa iku pengajar ti profesional ba sesebengkah subjek.
“Aku pechaya amat Menteri Pelajar, Sains enggau Pemansik Teknologi Dato Sri Michael Manyin enggau perintah nengeri tu semampai ransing deka bejadika juluk ati nya.
“Tau anang guai berumban kelalu mejah perintah baka ke bisi dipeda ba media rama,” pia ku iya madah.
Iya mantaika jaku nya maya bejadi Pengerami Pemesai Begulai enggau Rayat ba Rumah Liba Empian di Nanga Bua, Julau ditu, empai lama tu tadi.
Salang ti mega Kaban Parlimen Julau bela minta rayat berunding sereta beratika chura pelajar diatu ti mandangka mengkang agi begunaka pengajar ari Semenanjung Malaysia.
“Naka ke diatu, ari gaya tikas pelajar ditu, kitai agi begunaka bala pengajar ari Semenanjung laban kitai meseti berundingka pemujur pelajar anak kitai.
“Tang taja pia kitai enda ulih enda ngarapka sesebengkah chara ulih dipejalai dikena mutarka isu tu.
“Ambika banding perintah nengeri tau mansik penyampau nembiak ke diambi nampung pelajar ba palan pelajar tinggi tauka palan pematih pengajar ari rayat nengeri tu empu,” ku iya madah baru.
Ku Salang, pekara ke nyadi diatu baka maya menua Malaysia baru ngangkatka diri sepengudah dichiri merdeka dulu suba.
“Udah merdeka kitai bisii ngambi mayuh pengajar ari menua bukai baka Amerika Syarikat, United Kingdom tauka menua bukai nyeng- kaum menua India nyaup ngajar subjek baka Jaku Inglish, Sains enggau Matematik,” pia ku iya madah.
Berindik ari nya, iya ngarapka mensia mayuh sama bela beratika gaya pelajar nengeri tu baka ke diatu ti agi mengkang bekenaka pengajar ari Semenanjung Malaysia.
Ba pengerami tu mega, Salang dipebasa bejadi projek dapur kunsi rumah panjai kelimpah ngerah geran sepenyampau RM20,000 ngagai 46 pintu rumah panjai nya.
Nangkan ke nya iya bela bisi niki ngagai Rumah Hong Sing Sing di Nanga Bilat.
Ba dia, iya bejadi projek jalai semin rumah panjai 18 pintu nya.