26 iku nembiak Tabika Kemas Kpg Muhibbah udah nemuai ke APMM

MIRI: Bisi 26 iku nembiak Tabika Kemas Kampung Muhibbah, Kuala Baram udah ngatur penemuai meda kereban Ejensi Penerit Adat Maritim Malaysia (APMM) di Marina Bay ditu, apin lama ke udah.

Pengajar Tabika Kemas Nurul Akmal Arbi madahka penemuai ke bansa nya diatur dikena meri kelala ngagai bala nembiak mit bekaul enggau kereja raban ngena uniform enggau kereban ngetanka menua.

“Kami dekaka bala nembiak mit tu nemu pengawa ngetanka menua ukai semina dipejalai raban polis enggau soldadu aja tang mega ngaul APMM ti nyaga kandang tasik menua.

“Nengah penemuai tu ulih meri kelala enggau peneleba ngagai bala nembiak tabika enggau bala pengajar bekaul enggau pangku pengawa APMM nyaga pengelikun menua,” ku iya ba sebengkah penerang ngagai Utusan Borneo.

Rambau penemuai nya, bala nembiak udah diberi penerang ari beberapa iku pemesai APMM iya nya Leftenan Komander (M) Mohd Sharim Zakaria, Leftenan (M) Wan Syarafi Wan Mohd Nasir enggau Leftenan (M) Mohd Zahir Mohammad Basri.

Bala nembiak mit betubuh 26 iku dibagi ngagai dua raban udah nya dibai ngabas kapal KM Rhu enggau KM Stapa dipenggi APMM.

Ku Nurul Akmal, kesemua nembiak tabika berasai gaga enggau penemuai nya lalu meri timbal chukup manah.

“Rambau penemuai nya, mayuh tanya dituju bala nembiak ngagai APMM, tebal agi bekaul enggau operasyen di kapal nya.

“Aku ngarapka nengah penemuai tu, bala nembiak ila deka bisi juluk ati nyadi siku ari pemesai tauka raban APMM,” ku iya.

Penemuai sida bela disempulang tiga iku pengajar, tiga pemantu pengajar enggau 18 iku apai indai.

UNGKUP ALBUM: Bala nembiak, pengajar, apai indai enggau pemesai APMM begambar ba mua kapal dipenggi APMM.

KENANG MANIS: Raban ti nemuai begambar ungkup kenang pengudah tembu bejalai.

KE PENGINGAT: Pengajar Tabika Kemas Kampung Muhibbah nyuaka tepa ngagai pemesai APMM.

JULUK ATI: Siku ari nembiak nguji duduk ba penuduk juragan kapal.

NEMUAI: Nurul Akmal (kiba) begambar begulai enggau bala nembiak.