S’wak chakah ngemansangka infrastruktur digital
Perintah nengeri ngungkupka RM1 bilion dikena ngemanahka infrastruktur digital di selampur nengeri
KOTA SAMARAHAN: Sarawak diatu majak ngemansangka infrastruktur digital, alai perintah nengeri Sarawak udah ngungkupka RM1 bilion dalam kandang tiga taun tu ngemansangka teknologi pemadah sereta infrastruktur digital bukai, nyambung tikas digital di mengeri enggau di menua pesisir.
Tuai Pemegai Menua (TYT) Tun Pehin Sri Abdul Taib Mahmud madah atur tu digaga ngambi nentuka Sarawak ngembuan pengulih sereta palan ke tegap ulih besemekih dalam ekonomi digital.
“Maya tu, ekonomi global ke majak mansang begunaka penyendia ke silik ulih tiap iku pemain industri, kena beratika sida ulih besemekih enggau kompetitif agi dalam dunya ke nadai taka.
“Kitai di Sarawak, enggai kena tinggal dalam nyendiaka diri empu besemekih enggau orang bukai.
“Jaku Jeff Bezos iya nya seiku orang ke bempu Amazon.com tau digaga nyadi lalau dalam pengawa kitai nyendiaka diri enggau ekonomi digital. Ku iya, ‘What we need to do is always lean into the future; when the world changes around you, and when it changes against you – what used to be a tail wind is now a head wind – you have to lean into that and figure out what to do because complaining isn’t a strategy’,” ku Taib nerang.
Iya nandu baru madahka, bala graduet kemaya hari tu, ulih ngaga ubah ke berat, nengah chara nerenak ngembuan runding inovasyen.
“Kitai begunaka mayuh agi modal mensia ke ulih ngaga inovasyen baru. Inovasyen ke mai ubah. Inovasyen ke endang mida tiap seiku ketuai ari orang ke nitih iya. Kitai meseti mungkal inovasyen sereta ukai semina nyadi penguna inovasyen.
“Diatu, udah maya nya, kitai ke nyadi pemungkal teknologi jemah ila,” ku iya.
Iya madah munyi nya lebuh bejaku ba atur pengawa Konvokesyen UNIMAS ke21 di Dewan DeTAR ditu, kemari.
Taib ti mega nyadi Canselor UNIMAS madah chara belajar sereta inovasi ke endar bisi besangkut paut.
“Chara belajar nyadi ‘input’ ngagai inovasyen. Inovasyen enggai nyadi enti enda dipelajar. Dalam pekara tu, kitai mesti beratika pengenggai kitai belajar pasal inovasyen enda ulih semina terengkah ba kitai aja, dataika kitai nadai ngembuan runding ‘berinovasi’.
“Aku pechaya lebuh pengawa ke digaga kitai kemari, digempung enggau inovasyen kemaya hari tu, Malaysia deka nyadi tegut ukai semina dalam ekonomi digital, tang pengangkat Ubah Industri 4.0 sereta Pelajar 4.0,” ku iya.
Iya nandu baru madahka, inovasyen enda ulih dikeamatka, enti kitai semina bemimpi. Enti nitih, mimpi meri kitai kreativiti ke meri inovasi ke beguna, ke penguntung mensia mayuh,ku iya.
Ba atur pengawa nya kemari, Kepala Menteri Datuk Patinggi (Dr) Abang Johari Tun Openg dituduh mangku penuduk nyadi Pro-Canselor nganti niang Pehin Sri Tan Sri Adenan Satem ke midang pun taun tu tadi, alai keditu UNIMAS bisi dua iku pemesai Pro Canselor, iya nya Abang Johari enggau ex-Sapit Kepala Menteri, Datuk Patinggi Tan Sri (Dr) Alfred Jabu anak Numpang.
Sama bisi enggau ngulu atur pengawa nya kemari, Kepala Menteri Datuk Patinggi Abang Johari Tun Openg enggau bini iya, Datin Patinggi Dato Juma’ani Tun Tuanku Bujang, Pro Canselor UNIMAS Datuk Patinggi Tan Sri (Dr) Alfred Jabu anak Numpang enggau bini iya, Tan Sri Dato Sri Empiang Jabu, Chairman Lembaga Pengarah UNIMAS, Datu Dr. Hatta Solhi, enggau Mandal Canselor UNIMAS, Profesor Datuk Dr. Mohamad Kadim Suaidi.