676 sekula di S’wak ngerebut gelar ‘Anugerah SERASI’

KUCHING: 676 buah sekula ari serata Sarawak ke mungkur 100 buah sekula sekondari enggau 576 buah sekula primari enggau bepekit ngerebut gelar ba 7 kategori dalam ‘Anugerah Sekolah Rakan Alam Sekitar’ ( SERASI) ungkup taun 2016- 2017. Pengerami nyuaka gelar tu udah dipenyadi Sapit Kepala Menteri Datuk Amar Awang Tengah Ali Hassan di sebuah hotel ditu, kemari.

Awang Tengah datai ngarika Kepala Menteri Datuk Patinggi Abang Johari Tun Openg.

Kategori ke dipekit iya nya gelar SERASI ‘ Star’, ‘Overall SERASI Winner’, ‘Best Environmental Management’, ‘Best Awareness Efforts’, ‘Best Green School’, ‘ Best Clean and Beautiful School Ground’ enggau ‘Best SERASI Teacher’.

SERASI berengkah diatur ba taun 2004 lalu udah masuk edisi ke-8 lalu diatur enggau tuju meransang bala nembiak sekula ngintu pemeresi enggau pemaik kandang ngelingi sekula.

Gelar ‘Best SERASI Teacher’ serak tu pulai ngagai Hartini Kipli ari Sekula Primari (SK) Dua Sungai, Mukah enggau Linda Yip Soon Liang ari Sekula Sekondari (SMK) Sacred Heart, Sibu.

SK Dua Sungai, Mukah mega menang gelar SERASI Star begulai enggau SMK Bandar Sibu.

Ungkup kategori ‘ Best Environmental Management’ dipenggi SK Long Sepiling, Baram enggau SMK Pending Kuching.

SJK (C) Chuang Hua Miri enggau SMK St Patrick Mukah menang gelar ‘Best Awareness Efforts’ lalu kategori, ‘Best Green School’ pulai ngagai SJK (C) Min Daik, Bintangor enggau SMK St Joseph, Kuching.

Ungkup kategori ‘ Best Clean and Beautiful School Ground’, gelar diempu SJK (C) Chuang Hua Simanggang enggau SMK St Columba Miri.

Sekula Chunto SERASI pulai ngagai SJK(C) Tung Hua Sibu lalu pemenang ngaga logo SERASI pulai ngagai Mohd Yusuf Abdul Ghani.