40 iku PRS SMKM udah ngatur program servis komuniti ba ‘Home For The Aged’
MIRI: Bisi 40 iku kaban Pembimbing Rakan Sebaya ( PRS) Sekula Sekondari Merbau (SMKM) udah ngatur program servis komuniti ngagai rumah ngintu orang lunggar umur ‘Home For The Aged’, ditu, apin lama ke udah.
Pengajar Bimbingan enggau Kaunseling Aime Safri Dahlan, madah program belajar enggau meri servis komuniti sehari nya nyadi pemun ngagai kaban PRS ngaul diri enggau orang luar.
“Nengah program tu, ulih nempa runding ke deka mantu enggau ngemeranka ulah volunteer dalam diri tetiap kaban PRS.
“Kelimpah ari nya, tetiap PRS ulih nempa pengandal dalam diri ngatur program enggau ngemeranka pekara pemun kaunseling lebuhka betemu mua enggau sida ke diau di rumah nya,” kua iya ba sebengkah penerang ngagai Utusan Borneo.
Aime Safri madah penemuai keterubah PRS SMKM ngagai rumah nya disambut manah penyaga ti ngatur pengawa.
“Kaban PRS udah beripai meresi kandang ngelingi rumah, langkau endur orang tuai ngelantangka ati sereta ngelingi kandang luar rumah nya.
“Kaban PRS mega ngelimpangka diri berandau enggau orang tuai ke diau dia,” ku iya.
Ku Aime, taja bisi napi pemar lebuhka berandau enggau sida ke tuai, tang pekara nya enda nekul kaban PRS nanggam pemanah kaul enggau sida.
Kelimpah ari nya ku Aime, program udah diatur bala kaban enggau lanchar lalu semua sida ngayanka penyiru enggau pengiruh diri dalam aktiviti ti ngaul komuniti enggau pengawa volunteer.