Peranak Sri Aman patut ngena enggau manah DE
Ngambi ulih ngelakuka bagi menua tu ke mega Mengeri Benak Malaysia ngagai dunya luar
SRI AMAN: Peranak di Sri Aman kelebih agi raban nembiak diperansang ngena memanah ekonomi digital ( DE) dikena ngelakuka Pasar Sri Aman nyadi Mengeri Benak Malaysia ngagai temuai luar.
Kepala Menteri, Datuk Patinggi Abang Johari Tun Openg madah ungkup tuju nya, perintah udah ngemanahka perengka guna infrastruktur baka ngaga begunan pasar baru ngemuntangka bala temuai datai ke Sri Aman.
Pengawa ngaga Jalai Besai Pan Borneo mega deka mantu ngerichahka agi sektor dagang temuai di Sri Aman enggau ngemandakka timpuh pejalai ari Kuching ke Sri Aman,” ku iya.
Bejaku rambau Pengawa Bejadika Pesta Benak Sri Aman 2017 ditu bedau lama, Abang Johari madahka peranak Sri Aman mega patut ngiga jalai bukai dikena nyungkak penatai pemisi sida laban semua perengka guna infrastruktur udah bisi.
Ungkup pengawa nya mega perintah deka nambahka pengelaju arus internet di Sarawak ngambi ngemuntangka ekonomi digital dipejalai.
Ku iya, peranak Sri Aman mega tau ngelakuka main asal menua nya nengah ekonomi digital.
Ba lansa ke bukai, dikena ngemanahka agi rampa di tebing sungai Sri Aman, Abang Johari udah ngemendarka agih belanja penyampau RM5 juta dikena ngaga tebing sungai renggat keterubah.
Rambau pengerami nya, Tim Bujang Simanggang 7 mechahka tradisi Pesta Benak iya nya keterubah dalam sejarah 15 edisyen ngatur pengerami tu pengudah dipadu bulih gelar Raja Sungai Batang Lupar.
Sama bisi datai Menteri Muda Pengelantang Komuniti, Datuk Francis Harden Hollis, Kaban Kunsil Nengeri (ADUN) Lingga Simoi Peri, ADUN Bukit Begunan Datuk Mong Dagang enggau ADUN Engkilili Johnical Rayong Nyipa.
Pengawa ngaga Jalai Besai Pan Borneo mega deka mantu ngerichahka agi sektor dagang temuai di Sri Aman enggau ngemandakka timpuh pejalai ari Kuching ke Sri Aman. Datuk Patinggi Abang Johari Tun Openg Kepala Menteri