Bantu perintah besai ngagai P.Pinang ukai ketegal politik
KUCHING: Anang nyadika seiti isu bekaul perintah besai ti meri bantu ngagai nengeri Pulau Pinang ti dituntung penusah ampuh bah ketegal nengeri nya ke dipegai Parti Tindakan Demokratik (DAP).
Sapit Menteri Besai Datuk Seri Ahmad Zahid Hamidi madah penemu Menteri Besai, Datuk Seri Mohd Najib Tun Razak enggau iya empu, taja pan Pulau Pinang dipegai perintah nengeri ke enda sebaka parti enggau Putrajaya, tang ari penyiru sereta tanggungpengawa serata rayat Malaysia, Pulau Pinang tetap disaup.
“Aku udah ngasuh semua rayat ari pupu bansa mantu sereta ari sukut aset, semua ejensi opis kandang menua di asuh nurun mantu tekala nya.
“Kepala Menteri ( KM) Pulau Pinang, YB Lim Guan Eng bisi madah ke aku bekaul penusah nya dini hari kemari. Tekala nya kami ngatur bemacham bantu ari tetiap ejensi sereta opis kandang menua nurun ke Pulau Pinang mantu sida iya, lalu Guan Eng empu bisi madah ngagai aku baru, semua ejensi nya udah datai di Pulau Pinang,” ku Ahmad Zahid.
Iya madah munyi nya ba aum media pengudah ngepunka aum begulai enggau tuai pemesai polis di Mess Pegawai di Jalai Badaruddin ngalih hari kemari, lalu sebedau nya, kilah ke pagi, Sapit Menteri Besai nya ngepunka atur pengawa ‘ Aspirasiku, Negaraku’ di Dataran Perayaan di Petra Jaya, ditu, kilah ensana.
Ba bantu ke dianjung ngagai ruang bilik ke kena tinggang penusah ampuh bah nya, iya madah, perintah ngena ungkup ari NADMA (Agensi Bencana Negara alai iya empu nyadi chairman opis nya).
“Kami ngena ungkup tu ukai semina wang ringgit aja tang nyengkaum pemakai, perengka guna, palan pengentap enda lama, ubat sereta mayuh utai agi. Dalam timpuh 6 jam semua bantu nya udah datai di Pulau Pinang.
“Nya alai, enti bisi ruang bilik ke lalu bedau bulih bantu nya, tau betanya ba NADMA, Opis Bomba enggau Penyelamat tauka Angkatan Pertahan Awam (JPAM), RELA enggau PDRM, nyangka nadai jalai nuju ngagai endur nya laban ampuh, nyangka laun mimit datai ba endur nya.
“Perintah Besai komited mantu semua sida ke napi penusah nya, nyangka bisi orang bejaku madahka tu ukai tanggung pengawa Perintah Menua tang sigi Perintah Besai.
“Enda ibuh ngaga pekara tu politik laban orang ke napi penusah tu enda ngelala chura sereta parti politik, bansa…. Tiap iku mensia begunaka bantu. Enda ibuh kitai nyebut rayat Malaysia sigi seruran siru ke orang bukai di menua luar, aku pechaya rayat Malaysia bukai pan tetap deka mantu Pulau Pinang,” ku iya.
Ba lansa bukai, Ahmad Zahid ditanya pasal sindiket ke ngena (permanent resident tauka PR) menua tu nyadi ‘orang tengah’ (berurusan) enggau pegawai opis perintah bejalaika pengawa salah, ku iya:
“Aku deka pekara tu ditasat amat ke enda berita nya, lalu Kepala Polis Menua Malaysia (KPN) mega udah meri atur kuasa tetap, iya nya, iya enda (berkompromi), enda ibuh nyebut napuk barang pegawai polis, nyengkaum ijinsi sida ke bejalaika atur kuasa ke bisi bekait enggau pengawa salah, main judi ‘online’ tetap deka ditasat sereta di ukum nitihka atur udang-undang,” ku iya.