Semua staf LKIM dilalau bejalaika pengawa enggau lurus sereta komited
SIBU: Raban ke gawa ba Lembaga Kemajuan Ikan Malaysia ( LKIM) dipinta bejalaika pengawa sida nitihka atur ti udah ditetapka perintah enggau opis nya.
Direktor LKIM Sarawak Kusuadi Sallih madah, nyema gawa ningkah atur dia sida deka semak agi enggau ulah iya ke deka ngereja pengawa ke salah.
“Kitai ngarap semua raban LKIM ditu gawa enggau manah nitihka atur ke ditetapka.
“Tu kelebih agi ngagai sida ke agi biak ti beumur baruh 30 taun laban enti ngereja pengawa enda bepelasarka atur dia tau nejuka pekara ke enda manah nyadi nyengkaum tau ngenyaika nama LKIM,” pia ku iya madah.
Iya mantaika jaku tu maya Majlis Ikrar Bebas Rasuah (IBR) ungkup pemesai enggau raban LKIM Sitak II Mukah, Betong enggau Penyangkai Berikan LKIM Tanjung Manis di sebengkah hotel ditu, kemari.
Pengawa tu dikemataka Pemantu Commissioner Opis Penagang Penyalah Makai Suap Malaysia (SPRM) Sibu Jutim Nyagam.
Sama bela datai maya tu iya nya Direkter Penyangkai Berikan LKIM Tanjung Manis Ridzuan Salleh, Pemesai LKIM Betong enggau Mukah Abang Sapri Bawi enggau Mastam Nado nyengkaum 69 iku raban ke bukai.
Berebak enggau tu, Kusuadi bela bekunsika teks jaku Ketuai Direkter LKIM Malaysia M. Saedon Ab. Majid maya pengawa ke sebaka ti diatur bulan Ogos suba.
Ba dia, iya minta semua raban LKIM semampai gawa bepelasarka konsep ABCDE iya nya A (Amanah), B (Bijaksana), C (Cekap), D (Dedikasi) enggau E (Efisen).
“Enda ngira nama-nama pangkat, kitai meseti gawa enggau lurus, nitihka tanggungpengawa, nadai konflik ba diri, chakah, akauntabiliti sereta semampai nitih semua atur enggau undang-undang ngambika ulih nyeliahka diri ari pengawa enda manah baka makai suap,” ku iya madah baru.
Pengawa IBR ke sebaka udah diatur LKIM Renggat Nengeri Sarawak kena 5 Oktober tu tadi ti digulu lebih 100 iku raban.
Kelimpah ari nya, LKIM deka nandu pengawa nya baru ungkup opis nya di Miri kena bulan Disember tu ila.