100 iku nembiak udah ngulu ‘Program Kami Generasi Y: Belia Gemilang’
BINTULU: Bisi 100 pesereta iya nya bala nembiak ari tujuh buah sekula sekondari di bagi menua tu udah ngulu ‘Program Kami Generasi Y: Belia Gemilang’ ke diatur di Auditorium Perpustakaan BDA, ditu, bedau lama.
Program ke diatur begulai Opis Pengintu Pengelantang Mensia Mayuh (JKM) Bintulu, Palan Aktiviti Nembiak Mit Bintulu (PAKK) enggau Opis Pelajar Pelilih Bintulu nya ngaul nembiak Pom 2, 3 enggau 4 ari Sekula Sekonari ( SMK) Bandar Bintulu, SMK Kidurong dan SMK Kemena, SMK Bintulu, SMK Assyakirin, SMK Sebauh enggau SMK Tatau.
Bejaku bejadika program nya, Pemesai Pelilih Bintulu, Mataip Sayu madahka program ke bansa tu nyadi chara pemadu manah dikena ngemai raban nembiak ngelala pemar kemaya hari kelebih agi bekaul enggau pengawa bekenaka internet ngagai sida.
“Nengah program ke bansa tu, endang nyadi pelasar pemadu manah tetiap pesereta ngambika seruran nemu isu kemaya hari bekaul salah guna internet ti tau ngerusak runding, ulah sereta pengidup sida dudi hari,” ku iya.
Ku iya, tetiap nembiak enti ulih ngena memanah internet ngulihka penemu tetiap subjek ti dipelajar di sekula, ngiga penemu ba isu kemaya hari ti seruran meri pemaik ba pemansang akademik sereta kokurikulum.
Taja pia ku iya, bisi sekeda nembiak salah guna sambung internet ke diberi ngagai sida, masau jam meda website ti tau ngerusak runding enggau ulah sida.
“Nya kebuah apai indai bisi pangku pengawa beguna endar matau bala anak sida bekenaka internet, nentuka perengka guna ti diberi dikena memanah, ba tuju ti pulaika penguntung,” ku iya.
Antara batang tuju atur program dikena meri penyedar ngagai raban nembiak bekaul isu sereta penanggul ti ngaul bala sida kemaya hari sereta chara mutarka iya.
Berebak enggau nya, bejuraika pekara dunya nadai sekat sereta chara napi iya enggau ngulihka pemaik ari iya, ba pengawa ngangkatka pemanah tikas akademik enggau pengelandik ke bukai ti tau nambahka penyulut sereta pengelandik diri.