Komuniti Orang Ulu ulih mansang nengah pemisi DE
Sida dilalau ngena awak tu ngerapitka seraka ekonomi enggau komuniti bukai ngambika enda tinggal
MIRI: Komuniti Orang Ulu patut ngena memanah polisi ekonomi digital ( DE) ti dipejalaika perintah dikena nentuka sida enda tinggal ari arus pemansang.
Kepala Menteri Datuk Patinggi Abang Johari Tun Abang Openg madah, pemisi pinta bejalaika inisiatif sereta mai mayuh macham teknologi digital ngambika Orang Ulu enda tinggal.
“Dikena nyadi komuniti ke mansang, kitai nadai pilih kelimpah nengah ekonomi digital. Nyema mayuh agi komuniti Orang Ulu ngelala teknologi digital baka komputer enggau internet, pengidup sida dudi hari enggau nengeri tu deka mujur agi.
“Ekonomi digital deka ngubah chara kami ngemansangka menua kitai laban iya ngelui ari garis entara menua,” ku iya lebuhka bejaku ba pengerami makai lemai diatur Gerempung Serakup Orang Ulu Sarawak Malaysia (FORUM) di sebuah hotel tebilang ditu, malam kemari.
Batang tuju atur pengerami nya dikena makai selamat iya dipadu nyadi Kepala Menteri Sarawak ke-6.
Abang Johari nyemetak madah, kandang menua tanah tinggi komuniti Orang Ulu bisi pengulih ti besai berubah nengah ekonomi digital
Dikena nyadi komuniti ke mansang, kitai nadai pilih kelimpah nengah ekonomi digital. Nyema mayuh agi komuniti Orang Ulu ngelala teknologi digital baka komputer enggau internet, pengidup sida dudi hari enggau nengeri tu deka mujur agi. Datuk Patinggi Abang Johari Tun Abang Openg Kepala Menteri
kelebih agi ba pengawa betanam betupi enggau dagang temuai nengah penumbuh Kaunsil Pemansang Tanah Tinggi (HDA) enggau Ejensi Pemansang Ulu Rajang ( Urda) di baruh Koridor Kuasa Ulih Dikena Baru Sarawak (Recoda).
“Kitai ulih terus nanam semua asil betanam ba gaya hari ti manah di kandang tanah tinggi enggau eksport nengah e-dagang,” ku iya.
Ba pekara tu, ku iya, FO- RUM megai tanggungpengawa nyadi pelasar ti manah endar ngambika perintah ulih ngelala enggau ngemansangka menua nyengkaum tanah tinggi ke tebal agi peranak dia komuniti Orang Ulu, nyengkaum infrastruktur pemun.
Ku iya, bemacham inisiatif dipejalaika perintah nengeri ngambi ulih seruran ngemansangka nengeri tu sereta meri pemaik ngagai peranak iya nyengkaum Bank Pemansang Sarawak (DBoS), kompeni petroleum nengeri (Petros), ngangkat manahka tikas infrastruktur teknologi pemadah, Sarawak Pay , Data Big Sarawak, Raban Penerit Adat Multimedia Sarawak, enggau penumbuh unit hidrogen berindik ari pengulih hidrogen nyadi siti kuasa tau dikena baru sereta pemansut penatai pemisi chukup besai di nengeri tu.
“Tu visyen begulai kami lalu pekara ti dipejalaika kami diatu ungkup rebak dudi. Aku ngarapka komuniti Orang Ulu deka seruran begempung ngubah Sarawak nyadi ekonomi bepenatai pemisi tinggi, ku iya.
Berebak enggau pengerami nya, Abang Johari mega bisi ngemendarka peminta tanah lima ikar pemesai di kandang mengeri Miri dikena ngentak begunan FORUM.
“Aku enggau Awang Tengah udah ngelala sebidang tanah lalu setuju meri iya ngagai FORUM, ke alai tanah nya tau endur ngentak begunan ti nyadi kelai Orang Ulu moden,” ku iya.
Abang Johari mega bisi ngemendarka agih belanja penyampau RM250,000 ngagai FORUM dikena melanja aktiviti sepanjai taun sida.
Iya temegah ati ba pemanah pengawa enggau inisiatif FORUM laban mujur ngempung enggau ngempuruka semilan serakup etnik Orang Ulu di Sarawak di baruh siti gerempung.
“Terima kasih mega ngagai FORUM laban udah ngatur pengerami makai selamat pengawa maduka aku enggau penuh adat sereta pengawa asal Orang Ulu. Aku endang berasai siru sereta beterima kasih laban pemanah basa ti enda disadang ngagai aku,” ku iya.
Berebak enggau pengerami nya, Abang Johari enggau bini iya diberi basa pemadu tinggi ari raban komuniti Orang Ulu, bejalai atas tawak tauka ‘Panau Ujung Tawak’.
Sama bisi datai bini iya, Dato Juma’ani Tun Tuanku Bujang, Senator Datuk Lihan Jok, Sapit Kepala Menteri Datuk Amar Awang Tengah Ali Hassan, Menteri Muda Kaunsil Kandang Menua Datu Dr. Penguang Manggil, Menteri Muda Dagang Temuai, Seni enggau Main Asal Datuk Lee Kim Shin, Presiden FORUM Antonio Kahti Galis, Chairman Pengatur ke lalu nyadi Kaban Kunsil Nengeri ( ADUN) Telang Usan Dennis Ngau, ADUN Mulu Datuk Gerawat Gala sereta bala temuai dipebasa ke bukai.