Peranak Bintulu dilalau seruran nyaga pemeresi rampa menua
BINTULU: Bala komuniti diperansang seruran ngemeranka ulah nyaga pemeresi kelebih agi di semua kandang ngelingi genturung pendiau enggau mengeri dikena nentuka Bagi Menua Bintulu seruran beresi sereta diintu.
Menijar Besai Lembaga Kemajuan Bintulu (BDA), Rodziah Morshidi madah, bala komuniti patut diseridi ngambika enda muai uras sepeneka ati ngujungka rampa kamah lalu tanggungpengawa patut bisi diasai tetiap iku sida lebuh meda uras ngambika sida muai iya ke dalam tung uras.
Ku iya, pinta ngagai raban media ngambika mayuh agi ngarang artikel nerenakka penyedar sivik dalam komuniti ngambika sida ngemeranka ulah nyaga pemeresi berindik ari ulah sekeda piak ti nadai tanggungpenngawa bebuaika uras ngelanggar undang-undang raban kaunsil kandang menua.
“Ulah bebuaika uras nadai nitihka atur patut dipunas. Kami beratka pengawa tu dikena nentuka mengeri Bintulu beresi,” ku iya rambau Pengerami Makai Lemai Ngenang Pemanah Pengawa Media di Greens Hotel & Suites.
Nya alai ku iya, beserimbai enggau ngintu genap taun ke-40 BDA dalam taun baru (2018), kami deka ngelancharka kimpin pemeresi ngambika meresi uras, ngemunaska ulah bebuaika uras sereta ulah vandalisme dalam skala besai.
“BDA enda tetangkupka pengawa ngumpul uras tetiap hari, nyediaka pekereja ba tuju nya enggau nadai atur terit dipejalai ngagai mensia mayuh laban atur ti diterit nyema enda dititih bala komuniti, pengawa tu deka enda ulih dikereja belama,” ku iya nyemetak.
“Uji perati, nyema pekereja nadai gawa ngumpul uras kandang tiga hari tauka seminggu, tentu betugung uras di kaki lima kedai tauka kandang mengeri Bintulu,” ku iya nambah.
Iya belalauka gaya di Tokyo Jepun di Gunung Fuji nyadi siti menua ti suah digusung temuai, bisi agu ti chukup beresi, tung uras nadai uras lalu nadai pekereja meresi agu enggau tukang nyapu digaji di menua nya.
“Iya dikumbai ngintu diri empu nitihka atur lalu nguji muai uras di jalai Tokyo, siku muai, sepuluh iku deka datai volunteer ngambi iya,” ku iya nerang.
Nya kebuah, belalau ari nya ku iya, piak sida deka ngelancharka kimpin kena 6 Januari 2018 enggau penyereta peranak Bintulu.
“Kami deka madah peranak Bintulu ke kami endang beratka pengawa tu lalu ngajar bala komuniti ngam- bika anang bebuaika uras sepeneka ati baka uras ari teda industri.
“Nyema pengawa tu nadai nerima sukung, BDA nadai ulih ngetanka pemeresi Bintulu lalu patut ngena belanja ti besai ngaji pekereja ngumpul uras sereta nyapu kaki lima, enti nitih nadai pematut digaga,” ku iya.
Iya minta bala media bejalaika pangku pengawa ari diatu dataika bulan Januari tu ila, terus ngarang artikel ti nyeridi bala komuniti enggau ti bekaul nyaga pemeresi dikena nambahka pengasai serayanganti pengawa ngelancharka kimpin pemeresi nya ila.
Ku iya, pekara ti dikedeka piak sida, nyema bisi meda orang muai uras sebarang alai, ukai dalam tung uras, ripot terus penerang ngagai aku nengah Facebook, Whatsapp, nengah telefon tauka ke bukai ngambi ulih mutarka iya.
“Aku meri terima kasih ngagai raban media ti mayuh udah bejasa sereta meri bemacham ripot pasal servis BDA. Pengawa taun baru ngulihka timbal, mansik perambu enggau ngaul bala komuniti sereta media nyadika bakih,” ku iya.
Iya mega ngansak bala pengatur enggau pengendali media rama ngeripot penanggul bekaul enggau servis BDA ngagai iya sebedau naburka penerang dalam media rama sida.
“Sebedau timpuh 24 jam kami deka nguji mutarka ripot nya nyema nadai ditabur dalam media rama nyadi pengawa kepenudi dikereja.
“Nya alai, seruran ngaul kami laban mayuh ripot, nadai siti pen enda ditimbal. Ari orang ti enda dikelala, semua ditimbal aku,” ku iya seraya minta mensia mayuh ngeripot ngagai iya nyema bisi seksyen-seksyen di BDA ti enda bejalaika atur tauka enda kiruhka ripot ti digaga mensia mayuh.
Iya mega ngarapka bala bakih media deka bisi juluk ke sama sereta begulai enggau BDA nempa mengeri Bintulu ti beresi, manah, likun sereta ditapatka bala pengusung. SIBU: Sepengudah enda ditemu pendiau dalam kandang empat hari tu, seiku indai tuai udah ditemu mati, lemai kemari.
Niang Munah Tandang, 77, ari Rumah Unggat, Nanga Stapang, Batang Rajang, Kapit ditemu urung 1.21 lemai, kira 1 kilometer ari palan ke diripot niang nadai ditemu kena hari Lima minggu siti tadi.
Niang ke ditemu ba tebing sungai nangkan ke nya dibai piak polis.
Piak Bomba nerima ripot sentang pengelenyau niang pukul 11 pagi hari Lima maya nya.
Sebedau nya niang dipadahka deka nemuai ngagai bala iya ba menua enda jauh ari nya.
Kenyau ari nya iya lalu nadai temu pendiau.
Pengelenyau niang tu diripot menantu iya, Hanah Bujang, 55 ngagai piak polis.