Ketuai komuniti patut chakah ngatur program dikena ngenegapka penyerakup
SRI AMAN: Menteri Muda Pengelantang Komuniti Sarawak, Datuk Francis Harden Hollis minta bala chairman Komiti Pemansang enggau Pengelikun Genturung Pendiau ( JKKK), Rukun Tetangga enggau ketuai raban bansa baka tuai rumah sereta ketuai genturung pendiau regas agi gawa ngatur program komuniti dikena ngenegapka agi penyerakup sereta mantu perintah ngemansangka modal mensia ungkup pemaik semua.
Ku iya, semua pengawa ke benung dipejalaika perintah nadai meri asil nyema rayat enda beserakup sereta besaup.
“Kitai patut temegah enggau penyelai ke dikembuan nengeri kitai tu laban bisi rayat pupu bansa, adat enggau pengarap.
“Ba nengeri Sarawak, kitai ngerami mayuh pengerami lalu tu nyadi pengering semua kitai. Ambika chunto, pengawa ngatur pengerami ngelalu pengabang terang mandangka rayat kitai di Malaysia nyengala ngemeranka penyerakup,” ku iya.
Iya ke mega Kaban Kunsil Nengeri ( ADUN) Simanggang mansutka jaku nya lebuh bejaku bejadika Pengerami Makai Lemai Integrasyen Main Asal Kawasan Rukun Tetangga (KRT) Bagi Menua Sri Aman diatur Opis Penyerakup Menua Enggau Intergrasyen Nasional ( JPNIN) Bagi Menua Sri Aman enggau Komiti Permuafakatan KRT Sri Aman di Balai Suarah semak ditu, malam kemari.
Ku iya, pengerami ke bisi ba Malaysia tu ulih meri awak ngagai bala temuai datai ari menua luar lalu sida meda kediri empu baka ni atur ketuai enggau rayat ditu ulih berami begulai enggau penuh pengelantang sereta pengelikun.
“Kitai ulih idup likun sereta lantang laban kitai ngemeranka penyerakup enggau bekunsi kuasa ba rayat pupu bansa. Penyerakup tu patut dikemeratka agi sereta dikemeranka ba raban pemesai enggau ketuai raban bansa,” ku iya nerang.
“Anang kitai ngumbai penyerakup tu pekara ke mit lalu anang mega kitai ngerunding iya mengkang baka nya enti kitai enda ngeringka iya. Patut ingat, penyerakup ke diasai sehari tu asil ari pengeransing orang tuai sebedau tu ke nadai nemu leju ngangkatka menua merdeka sereta ngemeratka penyerakup bansa.
“Anang sesekali kitai layap enggau penyenang ke diasail diatu lalu anang kitai endang ingat patut ngetanka penyerakup enggau semangat be- gempung ke dikembuan kitai sehari tu,” ku tandu iya.
Nya alai, ku iya endang dikearap kitai pengawa ngatur pengerami baka tu endang patut diatur baru ba taun-taun ke deka datai.
Sama bisi datai Direktor JPNIN Nengeri Sarawak, Dirwana Azool, Pemesai Penyerakup Sri Aman, Fikri Emir Zulkeffli, Temenggong Kuek Aik Seng, Pemancha Lee Siang Hua, Pemancha Micheal John Sanggop sereta bala bukai.
Pengerami nya mega dirichah enggau pekit tanda enggau karaoke antara bala kaban KRT di Bagi Menua Sri Aman.