Pengajar ngembuan tanggungpengawa ti besai ngadaka nembiak ti menyana
Sistem pelajar udah jauh mansang ari suba seriris enggau pemansang dalam dunya teknologi pemadah
DEBAK: Bala pengajar bisi tanggungpengawa besai nempa pemanah ulah bala nembiak nengah pelajar ti menyana. Nya alai, nengah pelajar nya ulih ngadaka rebak baru ti manah dudi hari.
Sapit Pemesai Pelajar Pelilih Betong Aleksay Aman madah rebak kemaya hari benasit endar bisi ngasaika bemacham perengka guna ti meruan enti dibanding enggau ke dulu suba, semua penerang muntang diulih, sekalika nengah internet tauka perengka guna ti disediaka raban sekula.
Ku iya nambah, sistem pelajar di nengeri tu majak mansang dibanding dulu suba lalu pengajar dilatih memanah seriris enggau peminta ba pengawa nempa pengajar ti bekualiti.
Iya ti ngarika Kaban Kunsil Nengeri (ADUN) Saribas, Muhammad Razi bejadika Pengerami Graduasyen enggau Apresiasyen Sekula Sekondari (SMK) Saribas semak ditu madahka pengerami taun tu ke pemadu manah ke alai mayuh nembiak sekula nambahka penyulut ba pelajar sida kelimpah regas ba bidang ko-kurikulum.
“Bisi penyulut ba pemutus peresa ari taun ke udah lalu tu nyata ngayanka sistem pelajar di sekula udah ulih diterima semua nembiak,” ku iya nerang.
Ngelansa pasal penyapai Afiq Azwan Hazemi ti dipadu nyadi Tokoh Nembiak sekula nya, iya ngarapka tu deka nyadi peransang ngagai bala nembiak ke bukai ngambika terus mansang sereta ransing agi belajar.
Berebak enggau nya, Aleksay mega ngarapka apai indai seruran matau aktiviti luar bala anak sida kelimpah ngajar anak sida.
Pengawa milih Afiq Azwan Hazemi nyadi Tokoh Nembiak belalauka penyapai iya, iya nya Nembiak Nyulut Kurikulum Pom Enam Atas (Ekonomi/Sastera) , Nembiak Nyulut Kategori Pom Enam, Pemadu Nyulut Subjek Pengajian Am, Sejarah, Pemadu Manah Kesemua Pom Enam Atas, Pemadu Manah Pom Enam Atas Ekonomi/Sastera Penuduk Lumur Satu.
Iya pulai mai trofi, Anugerah Tokoh Nembiak, Setipikit, Plaq kelimpah perais ke bukai.
Ditanya nama pengasai Afiq ba pemujur nya, iya berasai gaga endar sereta deka bebendar agi nempa penyulut napi peresa semester kepenudi minggu baru.
Sama bisi datai Prinsipal sekula, Merni Bujang. KUCHING: Gerempung Dayak Sarawak ( PEDAS) nesau semua kaban PEDAS enggau peranak asal Sarawak di selampur nengeri bela sampal datai ngulu gempuru likun ti diatur Serakup Dayak Iban Sarawak (SADIA) kena 13 November tu, di Tebing Sungai Kuching.
Nitih ku Mandal Presiden I PEDAS, Pete Bujang, batang tuju ngatur gempuru likun nya minta sereta ngansak perintah nengeri tu ngubah undang-undang tanah Adat Bansa Asal ( NCR) sereta ngaku Pemakai Menua enggau Pulau Galau (PMPG) dalam undang-undang tanah Sarawak.
“Udah kelalu mayuh kes penyarut antara orang ke bempu tanah NCR enggau kompeni ke diberi perintah Provisional Lease (PL).
“Bisi mega sekeda kes ngujungka bebadi nyawa baka kes tanah ba Sungai Arip, Balingian. Ba bansa Dayak, tanah tu meh jalai pengidup sida,” ku Pete madah nyemetak.
Nangkan nya ku Pete, beambika chunto kes pechara tanah NCR antara peranak asal Kampung Lebur, Serian ti udah nguan menua nya enda kurang ari tujuh peturun, sida lenyau hak ba tanah nya pengudah perintah nengeri ngeluarka PL ba tanah ti ditampung sida ari jeman kelia.
“Kitai bansa endang bepegai teguh ba sempekat sereta undang- undang ti digaga perintah nengeri tu, nya kebuah kitai agi angkunka pemutus ti digaga kort ba pechara tanah taja pemutus nya dipeda enda patut sereta dichiping.
“Taja pia, ukai reti kitai enda puh ngetanka hak kitai, tang kitai balat bebasaka sida ti ngaga undang- undang. “Nya kebuah kitai nyukung pengawa diatur SADIA, minta perintah nengeri tu bela bebasaka hak kitai ke nyadi peranak asal, tanah tu endur kitai beridup, pengidup kitai bansa Dayak bepanggai ba tanah,” ku Pete nandu.
Ketuai PEDAS Pampang Kuching ke lalu nyadi Vice Presiden II PEDAS, Victor Ason, bela mantaika penemu ke sebaka senentang tuju pengawa ti deka ngempuruka bansa Dayak kelai sukung seraya mantaika peminta sida ngagai perintah ti megai kuasa.
Ku Victor, agi tubah kes tanah NCR nganti dipechara ba kort tang pemutus menang kes endang mar.
“Kitai bansa Dayak napi pemar deka menang kes pechara tanah tu berindik ari kes tanah NCR Tuai Rumah Sandah ti madahka PMPG nadai ngembuan kuasa undang-undang.
“Nya kebuah, kami ke nyadi gempung ukai dikuasa perintah (NGO) ti negika hak bansa Dayak meransang semua peranak asal ke bisi menggi tanah NCR di nengeri tu bela sampal datai ngulu pengawa tu.
“Anang berasai sanggu tauka nangi ngulu pengawa bejalai likun bebala mayuh tu laban udah bulih pemendar ari raban Polis.”
Kelimpah ari nya ku Victor, endang nadai salah kitai peranak asal minta hak diri ba perintah nengeri nentuka hak kitai kelebih agi ba tanah pesaka ari niang aki ini enda tebunsa ngapa.
PEDAS mega minta pemanah jasa perintah nengeri Sarawak narit semua apil pechara tanah NCR sereta nginsil semua PL ti udah dikeluar ngagai tanah NCR kelimpah minta ngetuka dulu pengawa ngemendarka PL seagi penanggul ngaul tanah NCR apin teputar.
Mensia mayuh enggau bala kaban PEDAS ti bisi ati ngulu pengawa bejalai likun bebala mayuh dipinta betanya dulu ngagai ketuai pampang ti besemak enggau sida laban bisi ‘konvoi’ diatur, meleka ari Miri ngelawa Bintulu, Sibu, Sarikei, Saratok enggau Sri Aman udah nya tembu di Kuching.
PEDAS nangkan semua bala ti ngulu pengawa tu enda bebaika senyata tajam, enda ngaga sebarang provokasyen sereta nitihka atur ti udah ditetapka raban polis enggau komiti pengatur.
PEDAS ngarapka pengawa tu ila mujur sereta lanchar lalu bansa Dayak ulih beserakup ngetanka hak sida, kelebih agi ba kes tanah NCR.
“Maya konvoi tu ila, bala ari Terabai Menoa, DRAF, Dayak Think Tank Group (DTTG) sereta NGO Dayak ke bukai bela nyempulang kelai sukung sida ngagai pengawa ke diatur SADIA.”
“Tanah kami pengidup kami” ku Victor nyimpul.
Sebedau tu, Presiden PEDAS, Mejar (B) Capt Collin Imran mega bisi ngeluarka penerang nyukung pengawa bejalai likun bebala mayuh, ke alai iya bepenemu amat patut perintah nengeri chakah sereta bebendar agi mutarka penanggul nya lalu chara dikena mutarka penanggul nya patut ulih diguna dalam timpuh panjai.
Aleksay Aman Sapit Pemesai Pelajar Pelilih Betong