Pekit pemeresi nentuka pedagang ngenahka pemakai ti beresi
BINTULU: Pekit pemeresi palan pemakai enggau pak kupi endang entara pelasar pemadu manah meransang ulah nyediaka pemakai beresi enggau bepengerai ngagai bala pedagang industri pemakai enggau ai irup di bagi menua tu, pia ku Menijar Besai (Servis Rampa Menua) Opis Pemansang Bintulu (BDA), Wan Ibrahim Wan Ali.
Ku iya, nengah pekit ke bansa tu endang nyadi chara proaktif BDA ngaul semak bala pedagang pak kupi ditu ngambi nyaga pemeresi premis sida empu nyengkaum dapur (endur berapi enggau nyediaka pemakai), agu enggau pemeresi endur bala pelanggan makai.
“Nengah pekit ti diatur ninting taun tu mega bela nerima kerejasama ari Kelab Rotary Bintulu enggau Opis Menteri Pengerai Malaysia (KKM) Bintulu endang ulih nempa tetiap pak kupi di Bintulu nyapai tikas pemeresi pemadu manah seriris enggau Bintulu benung mansang nyadi sebuah mengeri industri pemadu besai di Wilayah Tengah Sarawak,” ku iya.
Ibrahim mansutka jaku nya rambau Pengawa Ngelanchar Pekit Pemeresi Palan Pemakai 2017/2018 ti diatur di Opis Servis Mengeri (PERBINDA) BDA, ditu, pagi kemari.
Seraya madahka pekit diatur engkeman enggau jam iya, iya ngarapka semua pedagang pak kupi di bagi menua tu seruran beratka pekara pemeresi premis laban penilaian deka dipejalaika BDA enggau berundingka beberapa kriteria sekalika piak sida tauka ari mensia mayuh.
“Pekit pemeresi tu ukai reti pengempu pak kupi semina nyaga pemeresi ba sekeda timpuh aja, tang sida patut ngemeranka pemeresi nyadika pekara pemadu beguna seagi sida bejalaika dagang dalam industri nyediaka pemakai,” ku iya nerang.
Dalam jaku iya, Ibrahim mega ngelalau semua pengempu premis pemakai ditu seruran nyaga pemeresi sistem parit di premis sida empu enggau enda muai teda minyak enggau teda pemakai ke dalam parit.
Semua tu ku iya nentuka parit enda tepeku, ukai semina nekul sistem parit, tang mega nyeliahka igi penyakit kelebih agi chit besarang, nyamuk, kechai ketegal parit ti kamah.
Pemesai Teknologi Pe- makai ari KKM, Sylvester William Silan madah, bisi 22 buah palan di Bintulu udah dipinta nutup palan pemakai ari piak sida laban ditemu kelalu kamah sereta enda ngemeranka atur nyediaka pemakai ti beresi.
“Statistik tu nyadi palan pemakai ti diasuh kitai tutut ari pun taun dataika bulan November taun tu,” ku iya.
Ku iya, piak KKM ngasuh palan pemakai nya ditutup pengelama 14 hari ngambika tetiap premis meresi premis dagang sida empu baka selama.
“Pengawa ke bansa tu ukai reti kitai ngukum tauka ngachau dagang pengempu palan nya, tang ngajar sereta meri penyedar ngagai sida ngambi ngemeranka ulah nyediaka pemakai ti beresi pulaika pemaik semua piak ungkup timpuh panjai,” ku iya.
Presiden Kelab Rotary Bintulu, Lee Lei Kiak begulai enggau pengatur pekit ke bukai antara ke bisi datai.