Raban nembiak rebak baru patut nemu pemesai guna ekonomi digital
SRI AMAN: Raban nembiak rebak baru patut nemu pemesai guna ekonomi digital (DE) ngagai pemansang menua kelebih agi ari sukut ekonomi. Berindik ari pekara nya, pengawa ngelaku sekeda program ti ulih matak temuai enda ngira ari menua luar tauka ari menua tu empu ulih digaga enggau jampat nengah pemansang teknologi digital.
“Ba aku, pengerami ti ulih mantaika pemanah rampa menua sekeda menua, baka ti benung digaga diatu iya nya ‘Pesta Benak’ patut dilakuka nengah teknologi digital, ngambi ulih matak mayuh agi peranak ari bagi menua bukai nemu program tauka aktiviti ti bisi digaga.
“Kelimpah ari nya, pekara tu mega ulih ngangkatka penatai pemisi peranak ti nguan pelilih tu ke ulih nyual sekeda asil pengelandik jari, pemakai sereta pekara ke bukai ngagai temuai ti bisi datai,” pia ku Adriel Nyawai Robin lebuh ditanya pengarang berita bekaul pengerami ‘ Pesta Benak’ ke digaga di Sri Aman ti belabuh ari 3 nyentukka 5 November bedau lama.
Iya ke mega peranak asal ari Krangan Mong, Lubok Antu ti dipegai bagi menua Sri Aman madahka dunya kemaya hari tu enda baka 20 taun ke udah. Diatu perintah besai benung randaka raban nembiak ti ngembuan pengelandik dikena bela besemekih enggau menua luar napi Ubah Industri 4.0.
“Perintah diatu bendar ngelalau rayat kelebih agi apai indai ngambi meransang anak sida ngulihka penemu ukai semina dalam pelajar aja, tang mega dalam pekara pengelandik.
“Nengah pansik, diatu udah nyata graduet ari bidang pengelandik jampat agi diterima gawa dalam sektor industri, lalu tu berita manah ngagai raban nembiak ti deka napi peresa Sijil Pelajaran Malaysia (SPM) ngambi nguingka runding sida nyambung pelajar dalam bidang pengelandik,” ku iya nandu.
Adriel siku staf seiti kom- peni minyak enggau gis di menua tu madahka teknologi digital endang pekara ti dikemerat dalam semua pekara kelebih agi ari sukut ekonomi ke mega nyambut peminta Kepala Menteri Datuk Patinggi Abang Johari Tun Openg ti bebendar minta rayat di nengeri tu mekuhka diri enggau ekonomi digital.
“Nengah jaku lalau Kepala Menteri ba jaku pemuka iya bejadika ‘Pesta Benak’ tadi mega udah enggau naka ulih minta peranak di Sri Aman ngambika ngena enggau man- ah pemisi ekonomi digital ti ulih ngangkat tikas pengidup semua serak komuniti dalam dunya pemansang tu. Lalu nengah ngelakuka pengerami ti disambut kitai seharitu mega ulih nguna teknologi digital ke entara pati ekonomi digital ti nyadi polisi besai KM kitai,” ku iya.
Ba lansa ke bukai, dikena ngemanahka agi rampa di tebing sungai Sri Aman, Abang Johari udah ngemendarka agih belanja penyampau RM5 juta dikena ngaga tebing sungai renggat keterubah.