Peranak Baram deka rugi enti milih penyakal: Penguang
Sida deka rugi bepuluh juta ari sukut pemansang ungkup timpuh lima nyema sida milih penyakal ngarika sida
MIRI: Peranak dalam sitak Parlimen Baram deka nadai teulihka sebarang pemansang ari agih belanja RM6 juta ti diagih ngagai sitak nya tetiap taun, nyema sida milih penyakal maya pengawa bepilih ti deka datai.
Reti iya, dalam kandang lima taun, agih belanja ari Kaban Parlimen RM30 juta, ulih ngasuh peranak di Marudi enggau Baram ngasai sereta meda mayuh bengkah pemansang dipejalai ngena belanja nya ari perintah.
Ba renggat perintah nengeri, tetiap iku Kaban Kunsil Nengeri ( ADUN) deka nerima RM5 juta setaun dikena ngagihka belanja ungkup projek pemansang ari baruh Program Transformasyen Menua Pesisir (RTP), pia ku Menteri Muda Kaunsil Kandang Menua, Datu Dr Penguang Manggil ke mega ADUN Marudi.
Ditambah enggau agih RM3.5 juta ari baruh Projek Mit Pemansang Menua Pesisir ( MRP) ngagai iya (nyadi menteri muda) setaun, ke alai semua penyampau diasaika peranak di sitak Marudi manggai RM8.5 juta, enda nyengkaum agih belanja dikemendar ungkup pengawa ngaga jematan, jalai, tebing sungai Marudi sereta ke bukai, dipelaba abis nadai RM10 juta setaun.
“Nyema dalam lima taun, penyampau iya RM50 juta (ari perintah nengeri aja), tang nyema kita milih penyakal, kita deka lenyau RM50 juta. Jalai enda deka dikemanah, bekal kuasa karan enda deka datai ba kita,” ku iya.
Nya kebuah Penguang ngelalau peranak di sitak Marudi enggau sitak Parlimen Baram nulak politik penyakal ti semina bisi maya pengawa bepilih enggau semua semaya, ke amat sida enda ulih nulung rayat, anang ke nyediaka agih belanja pemansang.
Penguang mansutka jaku tu lebuhka bejaku ba Program Pemesai Begulai Enggau Rayat di Rumah Meran Surang, Genturung Pendiau Loagan Bunut ditu, apin lama ke udah.
Iya mega ngingatka rayat anang alah asut ‘politik duit’ penyakal ti deka meri RM50 tauka RM30 ngagai rayat ti ngundi sida.
“Politik duit ke bansa tu enda deka lama lalu nadai mai kita nyingkang jauh. Keingatka kita bisi bala anak, uchu enggau rebak dudi hari ti patut nampung pemansang ukai semina ungkup setaun dua aja,” ku iya seraya ngelalau peranak di menua pesisir anang berani ngambi risiko ba pengidup sida dudi hari.
Penguang mega ngingatka peranak ti ngambi bagi dalam pemansang ekonomi ke diatu enggau ngerebut peluang nengah sektor dagang temuai, nyengkaum ngadaka homestay.
Ku iya, peranak di Kampung Loagan Bunut udah bisi ‘chap’ tebilang iya nya Loagan Bunut National Park. Nya alai, tu maya ungkup sida ngidupka baru ‘chap’ nya nengah pengawa ngelakuka homestay di kandang menua sida lalu ngidupka baru sektor dagang temuai di kandang menua nya.
Berebak enggau program nya, Penguang bisi ngemendarka agih belanja RM5,000 ungkup Biro Indu Genturung Pendiau Loagan Bunut, RM10,000 ungkup Komiti Pemansang Enggau Pengelikun Genturung Pendiau (JKKK) dikena melanja aktiviti sida.
Ungkup projek ke bukai nyengkaum ngemanahka rumah panjai, nyemin laman ba mua rumah panjai sereta ke bukai, ku Penguang, iya deka berundingka pekara nya dalam RTP taun baru.
Penguang nyamin peranak deka nyediaka agih belanja ti manah agi nyema sida mantaika sukung ti manah ngagai perintah Barisan Nasional (BN) maya pengawa bepilih ti deka datai, nyadi kelai pengangkun diri.
Bini Penguang Datin Monica Ukong, Sekretari Politik Kepala Menteri Alexander Asing, Chairman Kaunsil Pelilih Marudi Edward Mendai enggau Tuai Rumah Meran Surang sekeda ari bala ke bisi datai.
Datu Dr Penguang Manggil Menteri Muda Kaunsil Kandang Menua