RM5 juta diungkup kena mansik Sel Minyak, Hidrogen

KUCHING: Sarawak Energy Berhad (SEB) ngungkupka puku RM5 juta dikena mansik Sel Minyak enggau Hidrogen, ke alai ungkup tu deka dikena ngepunka raban ti dipadu bejalaika pansik nya.

Siti ari peluang kuasa ke diguna kemaya hari tu, ke baru dipungkal pemanah kuasa nya, hidrogen, lalu gis tu deka nyadi pemerat ngagai dunya betukar ngagai teknologi gadung, lalu hidrogen tu mih teknologi gadung.

Kepala Menteri Datuk Patinggi Abang Johari Tun Openg madah, Sarawak beruntung endar laban ngembuan mayuh barang mata sereta ai.

“Enti kitai ngena ai masin, ai nya enda tau enda ditapis, muai garam sereta mineral bukai ari ai garam. Chara ngena ai masin tu mar agi rega, tang enggi kitai proses nya muntang agi laban ai kitai mayuh, tekad ai kitai pan mayuh,” ku iya.

Iya madah baru, Sarawak ngembuan mayuh pemisi pesaka menua ke ulih digaga nyadi kuasa.

“Ba peneleba aku, aku udah meda baka ni sebuah kompeni Jerman, Siemens ti ngemansangka Hidrogen, lalu tu gaya teknologi dudi hari ila, ti digaga ari ai.

“Tang kitai mega begunaka elekterik dikena mechahka molekul ai entara Hidrogen enggau Oksigen. Proses tu ke dikumbai Elektrolisis,” ku Abang Johari.

Iya madah munyi tu ba aum media ‘Siti Agi Pemujur, Pansik Sel Minyak & Hidrogen’ di Menara SEB ditu, kemari.

Bepelasarka gis tu ku iya, makit tagit kitai chukup besai.

“Di dunya kemaya hari tu, orang deka nukar nuklear lalu kuasa tau nyadi pemisi ke ulih nyendiaka kuasa, lalu enda ibuh agi ngena nuklear.

“Siti ari pilih kitai di Sarawak jemah ila ngena kuasa Hidrogen enggau Sel Minyak tu, iya nya lebuh Sarawak ngembuan LRT (pengangkut)laban kitai bisi elekterik, LRT bejalai ngena elektrrik, lalu nambah enggau nya, kitai ngena pemisi pesaka menua bejalaika LRT nya,” ku iya.

Abang Johari ti mega nyadi Menteri Pemansang Mengeri enggau Rampa Menua madah, dalam kandang 10 taun tu ila, teknologi deka tuai lalu mensia mayuh deka mindah ngagai ngena Hidrogen,sereta ai deka nyadi komoditi ke berega,” ku iya.

Ku iya baru,maya ai kurang dikena, ai nya ulih ditukar ngagai Hidrogen, lalu ulih ditaruh laban hidrogen ulih di ‘ liquefied’ nyengkaum hidrogen ulih di eksport ngagai menua luar laban nyauka semua orang ngena hidrogen diatu.

Lebuh ditanya baru sentang pengelama timpuh SEB deka ngaga pansik tu, ku iya:

“Kitai nuju ngagai 2030, lalu tu mih timpuh iya tauka tumu agi ari nya. Laban diatu kitai udah bisi teknologi. Semina tinggal bakani ku ngira ungkus nya. Ambika chunto, kitai bisi 10,000 tan hidrogen, berapa ungkus nya, bisi ke enda orang ari menua luar deka muka palan hidrogen nya ditu lalu meli hidrogen ari kitai,” ku iya.

Ku iya, Sarawak bisi pakar kediri empu, lalu enda ibuh ngambi orang ari menua luar.

“Kitai bisi pakar kitai empu, kitai udah bisi teknologi, semina bekerejasama enggau orang ke bisi teknologi nya seraya madahka hidrogen nya tau digaga ba sekeda endur baka di Batang Ai, Bakun tauka Bintulu,” ku iya.

Ba atur pengawa nya mega, chairman SEB, Datuk Amar Hamed Sepawi madahka Sarawak Energy udah ngurangka generasyen karbon intensiti 70 peratus kenyau ari taun 2009.

“Hidrogen enggau sel minyak bisi kaul enggau kuasa hidro lalu ulih dikena ba guna bukai baka perengka pengangkut.

“Nengah singkang sereta peluang ke udah diberi perintah nengeri tu, kami mungkal pansik sel minyak enggau hidrogen, beratika peluang gis tu ulih nyadi ekonomi hidrogen di Sarawak.

“Enti tu mujur, pemansang tu deka meri penguntung ngagai menua tu sereta muka peluang ke Sarawak eksport gis tu ngagai makit global,” ku iya.

Sama bisi ngulu aum media nya kemari, Menteri Utiliti Dato Sri Dr Stephen Rundi anak Utom, Sekretari Perintah Menua Sarawak, Tan Sri Datuk Amar Morshidi Ghani, Ketuai Pemesai Eksekutif SEB, Sharbini Suhaili. KUCHING: Piak bekaul industri kayu enggau produk kayu patut terus nempa komunikasi bekunsi penerang, penemu enggau strategi ngambika bulih penguntung ari pemansang ke tegap.

Chairman Confexhub Group Datuk Dr Abdul Aziz S.A Kadir madahka, laban sehari tu kampung asal di dunya enda ulih napi peminta tinggi produk kayu nengah pengemeran chara ngurus kampung ke diatu.

“Industri kampung diatu majak bepanggai ngagai kampung ti diurus enggau intensif sereta ditanam di Amerika Selatan, Afrika enggau Asia.

“Nya alai, amat beguna piak ke bekaul industri kayu enggau balak kitai ngembuan komunikasi ke nadai putus ngambika bekunsi penerang, penemu enggau strategi awakka industri ulih ngenan pemansang ke tegap,” ku iya.

Iya mansutka pekara nya lebuh bejaku nyerumba Majlis Perasmian Persidangan Perkayuan Global 2017 (GTC 2017) Ke-2 ke diatur Confexhub Group ti dipenyadi Sapit Kepala Menteri ti mega Menteri Pemansang Mengeri enggau Pengeraja Asal, Datuk Amar Awang Tengah Ali Hasan ditu, kemari.

Nitihku Abdul Aziz, sedar ngagai pemesai guna nya, juluk pengatur aum ke ngatur gempuru tiap taun pengemeran industri kayu ramu begempuru, mansik baru sereta mantaika mekanisma, iya nya CTC.

“GTS 2017 diatur leb ih ari semina dikena nempa kaul piak pengemeran sereta pengawa berunding pasal kuing industri, polisi enggau teknologi industri laban nya ti nyambungka pengaga polisi industri kayu enggau sektor peribit, peladang enggau pengeluar,” ku iya.

Ku iya, program pengelama dua hari nya endur bejalaika pengawa pemansik enggau struktur ti silik dikena netapka renggat ngagai semu piak dalam industri kayu enggau produk kayu.

Tu ngambika lebih nemu pekara ti bekaul enggau industro nyengkaum peminta ti nambah ba renggat dunya, piawaian antarabansa enggau aplikasi pensijilan teknologi baru industri kayu enggau produk kayu, ku iya.

Ngena rambai jaku “Strategi Dipacu Pasaran dan Inovasi: Teras kepada Pertumbuhan Mapan” bisi disereta lebih 20 pakar antarabansa enggau menua tu nyengkaum Autralia, Cameroon, Denmark, Perancis, Jerman, Hungary, Indonesia, Itali, Myanmar, New Zealand, Singapura, Thailand, United Kingdom enggau Vietnam.

Pengerami nya sama bisi digulu Menteri Muda Perambu Mengeri, Pengatur Tanah enggau Rampa Menua, Datu Len Talif Salleh, Pengurus Besar Perbadanan Kemajuan Perusahaan Kayu Sarawak (PUSAKA) Datu Sarudu Hoklai enggau Ketua Pegawai Eksekutif Kumpulan Confexhub, Paul Yeo.