Satelit Komunikasyen Bepeneras Tinggi keterubah di S’wak dipenyadi
KAPIT: Sapit Kepala Menteri Sarawak, Tan Sri Datuk Amar Dr James Jemut Masing ke mega Menteri Pemansang Infrastruktur enggau Perengka Pengangkut bisi nemuai seraya gawa ngagai Sekula Sekondari ( SMK) Baleh, Pelilih Bukit Mabong, bejadika Satelit Komunikasyen Bepeneras Tinggi nyerumba Pengerami Nyuaka Chek Projek Internet Bepeneras Tinggi Nengah Satelit di sekula nya, ngalihari Hari Satu tu tadi.
Projek tu dipejalai begulai ari baruh Tanggungpengawa Rama Korporat (CSR) tiga firma telekomunikasyen ti nyulut di Sarawak ditu iya nya Integrated Access Communication, Konsortium Bumi Group of Companies enggau TEL- BINA Technology Sdn Bhd.
Ku Masing, Satelit Komunikasyen Bepeneras Tinggi nyadi ti keterubah dipejalaika di Sarawak. Belanja ngelekatka perengka guna tu manggai RM50,000 tang bayar suwa nya tinggi agi. Belanja suwa urung RM200,000 setaun. Belanja tu asal pemeri ari TELBINA Technology Sdn Bhd, Konsortium Bumi Group of Companies enggau Integrated Access Communication.
“Pemisi satelit internet bepeneras tinggi dilekat ditu, bala nembiak SMK Baleh enggau bala pengajar di Baleh ulih ngulihka penerang 10 MBPS, pemadu deras di Kapit.
“Di Kapit semina 5 MBPS aja. Nya alai, pengudah sida diajar chara ngulihka sam- bung, sida ulih ngiga pemadah pasal pelajar. Pekara tu manah endar ngagai bala nembiak enggau bala pengajar ti ngajar sida,” ku Masing.
“Taja pia, tentuka sida enda salah guna. Aku nangkan sida anang sesekali salah guna sambung internet tu laban semua bansa pemadah bisi dia magang. Nya alai, kena memanah internet ungkup pemaik laban tuju iya ungkup pelajar. Tu jaku lalau ari aku,” ku Masing ngelalau ba aum pengarang berita.
Iya madahka diri berasai lantang endar ati ngagai dua raban – TELBINA Technology Sdn Bhd enggau Konsortium Bumi Group of Companies.
“Tu projek keterubah di Sarawak, dipejalai di SMK Baleh. Enggau sambung internet tu, kitai bisi penerang pasal pelajar. Ari nya, kitai ngarapka bisi pemutus ti nyulut agi laban sida (nembiak) diatu bisi sambung ngagai penerang.
“Bala sida ulih sebaka enggau bala nembiak di mengeri. Naka diatu, pemutus peresa perintah (PMR enggau SPM) di SMK Baleh enda entu manah. Ari sambung internet tu, dikearap kandang dua tauka tiga taun ti deka datai, pemutus deka manah agi,” ku Masing andal.
Ku iya, baka ke diatu SMK Baleh di menua ulu sereta semina ulih dilawa ngena bot, dua jam pejalai ngulu Batang Baleh. Iya ngarapka tiga ngagai empat taun ti deka datai, SMK Baleh deka bisi sambung jalai meraka sungai Jalai Nanga Mujong ngagai Nanga Antawau. Tu deka ngadaka sambung ti meruan agi di sungai enggau jalai darat.
Berebak enggau pengawa nya, Masing bisi gemendarka geran Projek Mit Pemansang Menua Pesisir ( MRP) RM15,000 seraya Kaban Parlimen (MP) Ulu Rajang Datuk Wilson Ugak Kumbong ngemendarka RM10,000 ungkup sekula nya bejalaika aktiviti pelajar ti udah dilanggur dikena ngangkatka pengawa belajar ngagai bala nembiak.
Nangkan nya, iya mega ngemata pengawa nyuaka duit suwa satelit RM200,000 ungkup taun 2018, Satelit Komunikasyen Bepeneras Tinggi datai ari tiga firma baka Konsortium Bmi Group of Companies, Integrated Access Communication enggau TELBINA Technology Sdn Bhd ti udah diterima Prinsipal Sekula, Lau Yuk Huck.
Projek Satelit Komunikasyen Bepeneras Tinggi tu dilangkar ungkup kandang menua pesisir ti enda disediaka teknologi kabel fiber optik. Pekara ti manah pasal ‘VSAT – Very Small Aperture Terminal’ iya nya servis broadband ti nadai tatak ba kuota. Peneras 10 MBPS enggau teknologi ulih manggai 100 MBPS, diterangka Ketuai Pemansang Dagang Integrated Access Communication, Radzib Ariff.
Batang tuju projek deka meri SMK Baleh di menua ulu ti nadai disedia teknologi kabel optik ti bisi akses ngagai internet ungkup pengajar enggau bala nembiak dikena sida belajar. Sambung internet dikena ngiga enggau belajar ari jauh. Sambung internet tu meri nembiak pengelala ti optimum, pia ku penerang ari Direktor Ngatur Pengawa TELBINA Technology Sdn Bhd, Jerry Mason.
Berebak enggau nya, Direktor Ngatur Pengawa Raban Konsortium Bumi Group of Companies, Ir Janang Bungsu dalam jaku dipansutka iya madahka firma sida melanja set televisyen 50 inci pemesai ngambika dilekat di Balai Mayuh Guna SMK Baleh disikap enggau Astro Beyond.
Residen Kapit Joseph Belayong enggau Pemesai Ngatur Pengawa Pelilih Bukit Mabong District Office, Kelvin Ligong, Ir Janang Bungsu, Radzib Ariff, Jerry Mason, Direktor Odin Synergy Dato Riben Rinah, Lau Yuk Huck, Menijar Palan Sivik Kapit Kaunsilor Bakat Gira, Penghulu Steward Sawing, Penghulu Undie Bajal, bala pengajar, nembiak sekula enggau mega apai indai, antara bala ke bisi datai rambau atur pengerami sehari nya.