MDS ngelangkar mayuh program nyerumba ‘Karnival Lumba Rayat’ kena 11 November tu

SIBU: Opis Kaunsil Menua Pesisir Sibu (SRDC) nangkan sida ke bekedai makai di Sibu Jaya ngambika enda ngengkah mija enggau bangku sida ba palan engkah kerita besemak enggau Pasar Malam Sibu Jaya.

Chairman SRDC Kunsilor Sempurai Petrus Ngelai madah, ulah baka nya tampak mandangka sida ningkah undang-undang.

“Palan paking tu endang dikena mensia mayuh ti datai ngelawa Pasar Malam Sibu Jaya ditu,” pia ku iya madah.

Ku iya, iya udah mantaika pekara nya ngagai rabanpenerit adat SRDC ngambika ngatur pengawa bekaul dikena nyeliah pekara nya tau nyadi baru.

“Kitai bekenaka timpuh mai mensia mayuh nyengkaum sida ke bejual di pasar malam iya ke baru dibuka tu teleba agi enggau ubah baru tu.

“Piak kitai mega ngelalau mensia mayuh baka sida ke bekedai makai semampai nitihka atur ti udah ditetapka enti enggai diukum,” ku iya madah baru.

Bekaul enggau pasar malam baru nya, Sempurai madahka pasar malam nya mujur ngubah kandang menua nya richah agi maya malam hari.

Sebedau tu ku iya, palan nya suba semampai sunyi tang diatu richah enggau penatai mensia mayuh.

“Pasar Malam Sibu Jaya tu mujur matak penatai mensia mayuh kelimpah nyaup mengeri baru Sibu Jaya majak mansang,” pia ku iya madah.

Pasar Malam Sibu Jaya bisi lebih kurang 100 iti kedai nyual macham bansa barang lebih agi baka barang pemakai enggau ai irup.

Pasar malam tu dibuka ari 4 lemai nyentuk 11 malam berengkah hari Lima nyentuk hari Minggu. SARIKEI: Kaunsil Pelilih Sarikei (MDS) deka ngatur ‘ Karnival Lumba Rayat’ kena 11 November ( Hari Enam) tu.

Program tu deka diatur di Padang Lumba Kampung Seberang.

Pengari Pengatur, Kunsilor Iskandar Naziri madah, sida bisi tagit lebih 1,000 iku deka datai ngerichahka karnival nya ila.

Program tu deka dipenyadika Kaban Kunsil Nengeri (ADUN) Kuala Rajang ke lalu nyadi Menteri Muda Perambu Mengeri, Pengatur Tanah enggau Rampa Menua, Datu Len Talif Salleh.

“Atur program deka berengkah urung pukul 7 pagi, dirichah enggau bemacham atur pengerami ti ngerinduka ati nyengkaum senamrobik, lumba rayat, autoshow enggau pemerindang busking.

“Batang tuju karnival tu diatur dikena nempa semangat lumba enggau besemekih ngagai bala komuniti,” ku iya lebuhka dirandau pengarang berita, kemari.

Kenu ku iya, program tu deka ngaul penyereta komuniti datai ari pupu bansa.

Ku iya, diatu raban pengatur benung nyediaka diri nentuka program lanchar diatur nitihka perambu.

“Kitai ngarap nengah pengawa ngatur program ke bansa tu ulih negutka tanggam kaul raban MDS enggau bala komuniti di menua nya.

“Berebak enggau nya mega, MDS deka ngatur hari begulai enggau pelanggan ngambika peranak ulih mantaika perambu enggau penanggul ditapi sida empu.

“Kitai mega deka ngatur woksyop ngaga gudi enggau ‘layang –layang tradisional’ kelimpah pemerindang khas wayang pacak ari Opis Pemadah,” tandu iya.