Pasar Malam Sibu Jaya richah sereta nyadi ikon di mengeri nya, ku Petrus
SIBU: Kandang dagang komersial Sibu Jaya diatu richah berindik ari pengawa muka pasar malam ti keterubah seminggu ke udah, pia ku Chariman Opis Kaunsil Menua Pesisir Sibu (SRDC), Sempurai Petrus Ngelai, ti ngumbai pasar malam nyadi ikon di mengeri nya.
“Iya ngadaka rampa ti idup di pasar Sibu Jaya. Ba hari ke bukai, mengeri tu sunyi pengudah jam opis abis.
“Ba aku empu, kelebih agi ba pemakai enggau konopi nitihka tandard enggau lampu bemcham chura – iya meri penampak lemai hari, matak penatai bala pengusung ari jauh enggau semak.
“Pasar malam kitai tu nyadi pematak penatai mensia mayuh,” ku iya madah ngagai The Borneo Post kemari.
Pasar malam bisi 100 bangsal bejualka pemakai enggau barang, buka tiga malam seminggu, berengkah ari pukul 4 lemai nyentuk 11 malam.
Bangsal ditusun enggau standar konopi kubing ngundang logo enggau jaku SRDC.
Ku Sempurai, sida udah ngadaka palan ungkup buskers ngerichahka agi rampa dia.
“Kami deka ngagauka orang ngambika merindang dikena matak penatai ukai semina sida ti rinduka muzik aja tang mega peranak Sibu Jaya bebelika barang di pasar malam. Ba penemu aku, pekara tu manah ungkup mengeri tu laban kitai dekaka iya richah agi,” ku iya.
Pedaja di pasar malam udah minta mayuh agi hari endur sida bejual.
“Kami begunaka timbal ari mensia mayuh ba pekara tu beberapa bulan.
“Kami deka nambahka penyampau hari ngagai sida bejual lebuh bisi peminta iya ditambah,” ku Sempurai.
Ba lansa ke bukai, pedaja pemakai, Jenny Tiong enggau tuchum iya lebuhka dirandau The Borneo Post, madahka iya berasai lantang bedaja dia.
“Bisi mayuh orang datai lalu semina irauka gaya hari aja. Kami beterima kasih ngagai SRDC ti udah nyediaka awak endur kami bedaja, ngiga belanja kena idup.
“Bangsal didiri enggau manah sereya dikearap, tu nyadi siti pematak,” ku iya nerang.
Ba lansa ke bukai, bisi pak kupi ngengkah bangku enggau mija sida ba lot paking semak pasar malam, Sempurai madah ulah ke bansa tu nyata ningkah atur.
Ku iya, iya udah madah ngagai inspektor kaunsil nentuka bala operatornitihka garis.
“Kitai begunaka timpuh ngajar mensia mayuh laban pasar malam baru aja berengkah dibuka. Nya kebuah, aku ngansal semua sida kelebih agi operator pemakai ngambi nitihka atur tauka sida deka ditinggang ukum,” ku Sempurai nangkan.