Pengawa ngemanah parit deka dipejalai bererenggat: Dr Sim
KUCHING: Pengawa ngemanahka baru sistem parit di nengeri tu ke udah manggai lebih 30 taun ti lama sereta jai deka dipejalaika bererenggat dikena nyeliahka penusah ampuh bah.
Menteri Kaunsil Kandang Menua enggau Pengawa Berumah, Datuk Prof Dr. Sim Kui Hian madahka penanggul tauka isu sistem parit ke enda manah nya endang bisi dibantaika Opis Entali Ai enggau Parit (DID).
Ambika chunto di Batu Kawa, pekara tu sereta parit baru deka digaga tauka dipejalaika berenggat, pia mega di serata Sarawak deka dipejalaika berenggat, ku iya.
“Ungkup belanja ke diagih endang enda kala chukup. Lalu semua pemansang Sarawak enda ulih dipejalaika sereta sekali nya kebuah kitai ngaga bererenggat.
“Tang ke pemadu beguna kitai deka nentuka seruran bejalaika pengawa ngemanahka baru parit (di menua tu),” ku iya lebuh dikerandau raban pengarang berita bekaul enggau isu ti madahka sistem parit di serata menua udah lama tauka jai tauka manggai lebih 30 taun patut dikemanahka enggau lengkas dikena nyeliahka penusah bah nyadi.
Dulu ari nya Dr. Sim ngulu aum kunsil nengeri ke diatur ba hari keterubah, kemari.
Bejaku baru, iya madahka dikena bejalaika pengawa ngemanahka sistem parit dalam sitak Batu Kawa begunaka ungkup belanja sekeda ari Program Transformasyan Menua Pesisir, belanja ari ADUN, DID sereta opis kaunsil kandang menua.
“Nya pekara ke deka dipejalaika kitai jemah ila,” ku iya ti mega Kaban Kunsil Batu Kawa.
Kelimpah ari nya lebuh ditanya bekaul enggau timpuh ke diberi ngagai raban kunteriktor ke ngereja projek ngemanahka baru sistem parit nya, iya madahka diri deka lebih terit agi ba atur udah tu ila.
Iya madahka diri enda meri peluang ngagai raban kunteriktor ke bepenanggul tauka nama ke udah dalam rikod ‘blacklisted’, dikena ngenukuka projek dipejalaika enggau engkeman.
“Aku deka ngaga ‘data besai’ endur ngerintaika nama, kad pengelala enggau penerang bukai pasal kunteriktor ke ‘blacklisted’.
“Laban kunteriktor ke bepenanggul nya enti udah bisi penanggul ambika chunto ngaga penanggul ba MPP udah nya lalu mindah ngagai MBKS udah nya mindah ngagai MBS enggau ke bukai.
“Nya alai kitai deka ngenukuka duit nya dipelanja enggau manah sereta kitai deka ngangkatka pemanah sekeda standard operation procedure (SOP),” ku iya. KUCHING: Perintah nengeri nengah Opis Menteri Dagang Antarabansa enggau e-Dagang deka chakah agi nyikap penemu digital enggau ngatur kus dikena mantu orang dagang nengeri tu senipak enggau pemansang ekonomi digital.
Menteri Dagang Antarabansa enggau E-Dagang, Dato Sri Wong Soon Koh madah, nya deka diatur chakah agi sereta begunaka sukung ari semua nyengkaum ejensi opis perintah nengeri enggau besai.
“Opis Menteri aku begulai enggau ejensi ti bekaul ba kededua opis perintah nengeri enggau besai, deka terus nyendiaka penemu digital ke patut, kus dikena mantu orang dagang kitai ngangkatka pemandai enggau pengulih sida ngena dagang online, edagang enggau ngelaku.
“Peminta transaksyen online ti majak nambah, dia majak mayuh dagang berubah ari ngena dagang chara lama.
“Berindik ari nya kitai enda tau ngubah runding kitai sereta jampat nempa gaya oranginsasyen ti bebida dalam pengawa dagang kitai. Kitai enda tau enda berubah sereta berunding enggau panjai agi ngambika ulih meda peluang ke bisi,” ku iya ti mega Menteri Wang Kedua.
Iya mansutka pekara nya lebuh bejaku ba pengerami nutup Sarawak eCommerce Forum 2017 (SeCF 2017) ke dipenyadika Kepala Menteri Datuk Patinggi Abang Johari Tun Openg, ke diatur ba sebuah hotel ditu, lemai ensanus.
Sarawak eCommerce Forum 2017 bisi bejuraika lima pekara iya nya E-Commerce: Getting the Idea Across; Jump Onto The Bandwagon: From Offline to Online; Going Global: Cross-boarder e-commerce; Logistics and Transportation: Haow does it all work? enggau Cloud Affairs: Cybersecurity, Fintech Adoption and Blockchain Technology.
Bisi 529 iku pesereta ngulu forum nya ti diatur Perintah Nengeri enggau kerejasama Angkatan Zaman Mansang Sarawak (AZAM Sarawak) lalu disukung MATRADE enggau SME Corp.
“Aku ngarapka forum tu beguna ngagai semua kita (pesereta) baka ni chara napi sereta peluang ke bisi ngena digital jemah ila,” ku iya.
Pengawa bejadika forum nya sama bisi digulu Menteri Muda Orang Dagang enggau Pemansang Dagang Mit Sereta Jelan Pemesai Datuk Mohd Natoden Majais, Menteri Muda Kaunsil Kandang Menua enggau Pengawa Berumah Datuk Prof Dr Sim Kui Hian, Menteri Utiliti Dato Sri Dr Stephen Rundi Utom, Menteri ba Opis Kepala Menteri (Integriti & Ambudsmen) Datuk Talib Zulpilip enggau Menteri Muda Dagang Tmuai, Seni enggau Main Asal Datuk Lee Kim Shin sereta ke bukai.