60 peratus pengawa jemah ila begunaka pelajar STEM
Pelajar tu ulih ngadaka mayuh pengelandik ke diguna dalam industri dikena napi Ubah Industri 4.0: Robert
KANOWIT: Urung 60 peratus pengawa jemah ila bekait enggau bidang Sains, Teknologi, Injiniring enggau Matematik ( STEM) kelebih agi dalam ‘Artificial Intelligence’ pengeregas ti berindik ari ubah industri ti keempat.
Kitai patut besedia ari ke diatu dikena napi ubah dunya ke endang deka nyadi. Dikena nyapai satus menua mansang ba taun 2050, komuniti patut nyadi medium ti nempa teknologi, lalu ukai semina nyadi orang ti ngena teknologi nya aja. Robert Chendang Sapit Pemesai Pelajar Pelilih Kanowit
Sapit Pemesai Pelajar Pelilih Kanowit Robert Chendang madah, STEM deka ngadaka mayuh pengelandik ke diguna kena ngangkat tikas produktiviti ti nyungkak pemansang ekonomi menua seriris enggau juluk ti deka nyadika Malaysia menua mansang ti bepenatai pemisi ti tinggi jemah ila.
“Kitai patut besedia ari ke diatu dikena napi ubah dunya ke endang deka nyadi. Dikena nyapai satus menua mansang ba taun 2050, komuniti patut nyadi medium ti nempa teknologi, lalu ukai semina nyadi orang ti ngena teknologi nya aja, ku iya madah.
Ku Robert madah, penyedar apai indai enggau nembiak sekula bekaul pelajar STEM endang patut dikena nyikap nembiak nyadi pekereja profesional ti dirandaka industri.
“Pelajar STEM meseti ditetapka dikena ngadaka modal mensia ti bekualiti tinggi kena napi jeman ti baru,ku iya nyemetak lebuh ti bejadika Pengerami Graduasyen enggau Apresiasyen Sekula Sekondari ( SMK) Kanowit ke-40 bedau lama ti udah.
Ku iya nandu, agenda pelajar ti bepelasarka pelajar STEM enggau abad ke-21 tu patut dikemeratka piak sekula.
“Berindik ari nya, pelajar STEM patut diatur ke bepelasarka nembiak, ti ngemeratka pengelandik berunding sereta nempa ulah ti manah, ukai semina mekuh ngagai pemayuh A ke diulih, ku iya.
Ku iya nambah, dalam jeman Ubah Industri 4.0, seiku nembiak ukai semina patut disikap enggau penemu ti patut, tang ulih berunding enggau kreatif sereta inovatif.
“Tu ngambika nama pan ke digaga ulih ngenataika pemaik ke sebedau tu enda diulih piak bukai, ku iya nerang.
Sama bisi datai iya nya Prinsipal SMK Kanowit Abang Ahmad Abang Abdul Wahab.