Bomba Komuniti Oya meseti sedia napi penusah ngenyit nyadi

DALAT: Kaban Bomba Komuniti Pelilih Mit Oya dipinta nyikap diri gawaka rayat di kandang menua nya kelebih agi maya penusah ngenyit bisi nyadi.

Kaban Kunsil Nengeri ( ADUN) Dalat Dato Sri Fatimah Abdullah mansutka jaku tu lebuh iya bejadika Program Komuniti ti udah nerima kaban ari lapan buah genturung pendiau.

Ku Fatimah, iya temegah ati beratika pengeransing volunteer peranak di genturung pendiau nya.

“Bomba komuniti iya nya raban keterubah ti ngesah ngagai penusah ngenyit.

“Ba penusah angus, raban ti keterubah datai meri bantu iya nya raban volunteer. Nengah komitmen enggau penyikar bala kita, kita ulih nyelamatka nyawa sereta keresa ke bukai,” ku iya.

Iya mega nyemetak madah pemesai guna raban volunteer meruan bepengerai, regas sereta sikar beratika penyadi ngelingi sida.

Fatimah, ke mega Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, ngarapka raban volunteer deka dilatih memanah.

“Raban volunteer deka seruran diberi latih ngambika sida ulih sedia napi sebarang penusah ti tau nyadi,” ku iya merambu.

Bela bisi diperambu iya nya aktiviti penyedar ungkup nembiak sekula enggau per- anak genturung pendiau pasal pengawa nagang penusah angus sereta penagwa ti patut dikereja ba penusah angus.

“Suah agi, api nyadi ari salah sambung tali karan. Senentang pekara tu kitai ulih ngelalau peranak ke bukai. Manah agi ngeluarka belanja besai ngaga sambung tali karan ti meruan ari ke lenyau semua keresa dalam penusah angus,” ku iya ngelalau.

“Nanga Baoh ti bisi semilan buah rumah panjai ti besemak mega patut bisi Bomba Komuniti,” ku iya merambu.

Ngagai bala apai indai, ku Fatimah, sida patut matau aktiviti bala anak diri maya kemisi sekula nentuka sida enda ngaul diri ba aktiviti ti enda menuku.

Ba lansa ke bukai, iya ngansak Komiti Pemansang Enggau Pengelikun Gentrurung Pendiau ( JKKK) ngambi ngaga pam ai di genturung pendiau sida empu.

“Aku udah nyebut pasal pekara tu ngagai JKKK dalam taun nyin kemari, bisi agih belanja aku beri ngagai tetiap JKKK di baruh Program Transformasyen Genturung Pendiau (KPT) meseti dikena ngaga pam ai nyema kita nadai ngembuan nya,” ku iya nambah.

Berebak enggau program nya, Fatimah bisi nyuaka agih belanja Projek Pemansang Mit Menua Pesisir (MRP) penyampau RM485,900 ngagai beberapa gempung.