RM5.745 billion diungkup kena ngaga projek besai
Ari penyampau nya RM409 juta diperambu dikena ngangkatka pemanah jalai penyambung di nengeri tu
KUCHING: Perintah nengeri ngelanggur deka ngena belanja sepenyampau RM409 juta ari ungkup belanja pemansang dalam Bajet 2018, dikena ngangkatka pemanah jalai penyambung di nengeri tu.
Kepala Menteri, Datuk Patinggi Abang Johari Tun Openg madahka, dalam bajet 2018 perintah nengeri ngungkupka belanja pemansang urung RM5.745 bilion dikena bejalaika sekeda program enggau projek besai di nengeri tu.
“Dikena majakka pengawa nyambung kandang menua serata nengeri, perintah deka ngaga mayuh agi jalai, jematan enggau palan penyangkai. Ke tuju nya, RM409 juta diperambu dikena ngemujur sereta nembuka sekeda projek.
“Projek nya baka jematan Sg. Limbang, jematan Sg. Bunut No.2 enggau nyambung jalai Limbang; jematan Batang Lupar, Samarahan/ Betong; jematan Long Lama, Batang Baram, Miri; langgur jematan Batang Kemena ba Jepak enggau Sebauh, Bintulu; sereta jematan Marudi ba Batang Baram, Miri.
“Bejalaika projek jalai besai ngagai Tapak Kaul, Mukah; Jalai Ijok/ Teguyo/ Lempaong/ Batu Pesok/ Rantau Layang, Betong; jematan Sg Bako ngagai Kpg Bako, Kuching; Datuk Temenggong Abang Kipali Bin Abang Akip Simpang enggau jalai baruh tanah, Kuching; R.C Riverwall di Kapit; Riverwall ba Sg Kanowit, Sibu enggau Riverwall enggau kereja bukai ba Fort Hose, Marudi, Miri,” ku iya.
Abang Johari ti mega Menteri Wang enggau Pengatur Ekonomi maya mantaika Bajet 2018 lebuh bejuraika Rang Undang-undang Perbekalan (2018), 2017 ba Aum Kedua Penggal Kedua Kunsil Nengeri Ke-18 ke diatur ba Kompleks DUN Sarawak ditu, kemari.
Nambahka nya nengah langgur ungkup belanja pemansang, perintah nengeri deka terus ngerembaika bungkur bekal ai beresi ngagai selampur Sarawak.
“Perintah nengeri deka terus ngerembaika bungkur bekal ai beresi kelebih agi ungkup mensia mayuh menua pesisir.
“Urung RM343 juta dilanggur dikena bejalaika sekeda projek bekal ai baka nyambung paip ari Assyakirin Reservior ngagai Loji Ai Beresi Nyabau; Ngemansangka Pemansut Bekal Ai Miri; pegung nakat ai Bukit Selatan enggau pengawa ke bekaul; bekal ai Semariang; Kemena Reservior; Bau/Lundu/Sematan Regional Water Supply; ngemanahka Loji Bekal Ai Ke Diberesi; masang baru paip ba jalai Kuching/Serian sereta nyambung paip ari Loji Nyabau ngagai Taman Industri Kidurong, Bintulu,” ku iya.
Kelimpah ari nya, dikena ngenegapka pemansang betanam betupi nengeri, ari penyampau semua langgur ungkup belanja pemansang bajet 2018, perintah nengeri ngagihka RM223 juta dikena mantu orang bumai bekebun mit di menua pesisir.
Projek besai ke dipejalai dikena ngangkatka pemansang betanam betupi iya nya program Induatri Pemansang Utai Tanam nyengkaum mulung, getah, padi nyiur, buah enggau herba, pengawa berikan, akuakultur sereta projek bekaul enggau jelu tupi kelimpah ari pelajar enggau ngelakuka betanam betupi sereta mekanisma enggau infrastrukur betanam betupi.
Sepenyampau RM430 juta dikena ngenyampat sereta nambahka pemansang menua pesisir ti nyengkaum program transformasyen menua pesisir (RM230 juta) enggau projek mit menua pesisir ( MRP) diagihka RM200 juta.
Iya madahka ari penyampau semua langgur be- lanja pemansang, perintah nengeri beratka pengelantang pendiau rayat lalu ba taun 2018 ngagihka ungkup belanja sepenyampau RM232 juta dikena ngaga Rumah Mampu Milik enggau Rumah Mesra Rakyat.
Perintah nengeri mega ngungkupka urung RM102.5 juta dikena bejalaika projek ngemansangka baru Darul Hana, projek ngemansangka baru palan pengentap Genturung Pendiau Sungai Bedaun, Kuching; ngemansangka genturung pendiau asal di Sibu enggau projek ngemansangka baru Pendiau Sungai Kapit Baru, Kapit.
Nambahka nya sepenyampau RM26.2 juta mega diperambu dikena bejalaika skim palan pengentap baru ba 16 genturung pendiau di selampur Sarawak, dikena nyampai juluk deka ngangkatka tikas pengelantang pendiau peranak di menua pesisir, ku iya seraya ngenang pemansang ke bukai.
Dikena majakka pengawa nyambung kandang menua serata nengeri, perintah deka ngaga mayuh agi jalai, jematan enggau palan penyangkai. Ke tuju nya, RM409 juta diperambu dikena ngemujur sereta nembuka sekeda projek. Datuk Patinggi Abang Johari Tun Openg Kepala Menteri Sarawak