PKR nyukung gempuru NCR diatur 13 Nov tu

KUCHING: Parti Keadilan Rakyat ( PKR) nyukung gempuru likun Tanah Adat Bansa Asal (NCR) kena 13 November tu ti ngayanka pengasa enggau pengeringat rayat.

Chairman PKR Nengeri, Baru Bian ba sebengkah penerang ensanus meri terima kasih ngagai raban polis laban udah meri pemendar ngatur gempuru nya, setipak enggau ungkup dalam undang-undang.

Ku iya, parti nyukung gempuru sereta ngenang pemanah pengawa Sekretari Besai Serakup Dayak Iban Sarawak (SADIA) Nicholas Mujah enggau ex-Sapit Presiden Nicholas Bawin, laban ngatur gempuru nya.

“Kitai arap endar bala pengatur nyadi orang bisi tanggungpengawa lalu gempuru tu deka diatur enggau likun,” ku iya nengah penerang ensanus.

Gempuru nya deka diatur di dua endur di Laman Dewan Undangan Negeri Lama/Kort Baru di Petra Jaya enggau Tebing Sungai Kuching/Kort Lama.

Baru ke mega Kaban Kunsil Nengeri (ADUN) Ba’Kelalan madahka gempuru nya ngayanka majak mayuh gerempung ukai dikuasa perintah (NGO) enggau orang ngatika diri majak nemu isu bekaul NCR sereta penanggul ti bekaul enggau Pemakai menoa (PM) enggau Pulau Galau (PG) ti ditapi komuniti asal Sarawak berindik ari pemutus Kort Perintah Besai dalam kes apin lama ke udah.

Pengasa bala rayat ba isu nya ulih diperati ku iya, laban iya bekaul enggau pekara ti beguna endar sereta deka lenyau tanah ngasuh sida angkat laban tanah nya pengidup sida.

“Gempuru tu diperambu dikena ngayanka pengasa enggau pengeringat komuniti asal laban kort enggau perintah baka ke ngachau hak sida.

“Pengenggai ngaku PM enggau PG baka ke deka ngemedis peranak asal ari sida ti enda meretika, tauka milih enda ibuhka adat enggau daya pengidup asal komuniti asal ti udah lama dikemeran sereta diaku,” ku iya.