DUN udah ngemendar SMA ungkup ekonomi digital
SMA deka meri penemu bekaul polisi enggau pemansang ekonomi digital nyengkaum pengawa E-Dagang
Bepelasarka pengawa ti bepelasarka undang-undang tu, enda besibil enggau sebarang undang-undang perintah besai, laban pemerat nya deka mantu menua tu nyingkang ngagai ekonomi digital. Datuk Seri Wong Soon Koh Menteri Dagang Antarabansa enggau E-Dagang
KUCHING: Kunsil Nengeri ( DUN) udah ngemendar numbuhka Sarawak Multimedia Authority (SMA) ke deka ngangkat sereta ngemansangka ekonomi digital (DE) nengeri tu.
Rang Undang- undang Sarawak Multimedia Authority Bill, 2017, udah di kemendarka pengudah dipejuraika 14 iku Kaban Kunsil Nengeri (ADUN) ari kededua piak, Barisan Nasional (BN) enggau penyakal, ba hari keterubah Aum DUN ditu, kemari.
Menteri Dagang Antarabansa enggau E- Dagang Datuk Seri Wong Soon Koh, lebuh mantaika Rang Undang- undang ( RUU) nya madahka SMA deka meri penemu ngagai perintah nengeri pasal polisi enggau ngaga pemansang ekonomi digital menua nyengkaum infrastruktur digital, pengelikun siber, pemansang pengelandik nyengkaum pengawa E-Dagang.
Wong ti mega nyadi ADUN Bukit Assek madahka perintah nengeri mega deka beratika pengawa inovasyen digital, Perintah digital sereta ngaga pansik enggau pemansang dalam komunikasi sereta pengawa multimedia nyengkaum ngemanahka agi ngena sistem elektronik di Sarawak.
Wong nandu baru madahka SMA deka betatika pemerat bekaul pengereja pengawa dalam pekara latih enggau pemansang modal mensia.
Perintah mega ku iya, deka nyendiaka pengawa ngena teknologi dalam E-Dagang nengah kompeni sereta pengawa dagang nyengkaum ngangkatka promosyen produk menua tu.
“Bepelasarka pengawa ti bepelasarka undang-undang tu, enda besibil enggau sebarang undang- undang perintah besai, laban pemerat nya deka mantu menua tu nyingkang ngagai ekonomi digital,” ku iya.
RUU nya kemari di sukung Menteri Pelajar, Sains enggau Pansik Teknologi, Datuk Seri Michael Manyin Jawong.
Wong nandu baru madahka SMA nya ila deka betuaika Kepala Menteri, ke nyengkaum tiga iku kaban, iya nya Sekretari Perintah Nengeri, ‘ State Attorney General’ enggau Sekretari Wang Nengeri.
SMA mega ulih ngulih, megai sereta di rejista nyadi orang ke bempu tauka “proprietor” ba barang (copyrights), patent tauka hak reta atas komunikesyen enggau produk intelek multimedia.