Pansik enggau silik SMA sebedau dipejalai, ku See
KUCHING: Kaban Kunsil Nengeri (ADUN) Batu Lintang See Chee How minta Kepala Menteri Datuk Patinggi Abang Johari Tun Openg mansik baru Rang Undang- undang Sarawak Multimedia Authority (SMA) enggau Opis Chamber (Attorney General) dikena ngemanahka agi atur undang-undang SMA sebedau dikemendar ulih dikena di nengeri tu.
See lebuh ke nimbal iya kemari madahka taja pan iya besetuju enggau penemu numbuhka SMA ke nengeri tu kelebih agi lebuh Sarawak ngangkatka Ekonomi Digital, sigi patut di puji.
“Taja pia, aku pan deka bekunsika pengirau ati nyema Rang Undang-undang SMA 2017 tu patut dikereja sereta chukup nitihka atur sereta undang-undang numbuhka SMA bejalaika pengawa sida sereta nyapai pemerat baka ke diungkupka dalam Rang Undang-undang SMA,” ku See.
Iya madah munyi nya lebuh mantaika debat iya bekait enggau penumbuh SMA ba Aum Kedua ke Penggal Kedua, Aum Kunsil Nengeri Sarawak ke-18 di Komplek DUN (Kunsil Nengeri) ditu, kemari.
Iya nandu baru madahka Kepala Menteri bisi nyebut pasal Artikel 95B sereta nitihka ( Ninth Schedule Legislative Lists), Pekara IIA, (the Supplementary to State List) ke sitak menua Sabah enggau Sarawak dalam Pekara 14 bekait enggau opis ke bejalaika kuasa sereta opis ke dipadu undang-undang nengeri.
“Taja pan kitai bisi kuasa numbuhka raban penerit adat renggat nengeri, tang kitai mesti bejaga, iya nya Rang Undang- undang tu bekait enggau penumbuh SMA nyadi entiti, nyadi sebuah opis ke megai kuasa dalam menua, ungkup ke teknologi pemadah sereta pengawa multimedia sereta pekara bukai ke bisi bekait enggau multimedia,” ku iya.
Iya nandu baru madahka iya bekunsi penemu enggau ADUN Kota Sentosa (Chong Chieng Jien), iya nya ngasuh Perintah Menua beratika Konstitusyen Perintah Besai, Pekara Semilan Lis Legislative Lis 1 – Lis Perintah Besai Pekara 10 ke mungkur ( Communications) enggau pengangkut.
“Kuasa ba pekara ke mit bansa tu diberi ngagai Komision Multimedia sereta Komunikesyen Malaysia (MCMC), alai kuasa MCMC bejalaika kuasa industri komunikesyen sereta multimedia sereta pekara bukai, baruh Genteran Tusun Ukum Multimedia enggau Komunikesyen 1998 tauka Genteran Tusun Ukum 588m sereta sekeda (subsidiary legislations) ulih dikena di dalam sereta di luar Malaysia, baruh genteran tusun ukum Seksyen 4 ari Genteran Tusun Ukum 588, baka ke disebut nyerumba ‘territorial enggau extraterritorial application’.
“Nya alai, Rang Undangundang ke disadang numbuhka SMA nyadi sebuah entiti nyadi sebuah opis ke bekuasa (authority) di menua tu, ke pemansang pengawa teknologi pemadah enggau multimedia, sereta pekara ke bisi bekait enggau multimedia, terang endar nuju kus ti besibil enggau genteran Tusun Ukum 588 sereta (subsidiary) genteran tusun ukum nya,” ku iya.
Iya nandu baru madahka Rang Undang- undang tu agi ulih disadang sereta dikemendarka, enti kitai (Sarawak) diberi kuasa ulih Parlimen bejalaika Ordinan SMA nengah Artikel 76A Konstitusyen Perintah Besai.
Taja pia, RUU SMA tu kemari, udah dikemendarka pengudah Menteri Dagang Entarabansa enggau E-Dagang, Dato Sri Wong Soon Koh macha sadang RUU nya tiga kali lalu dikemendarka Kunsil Nengeri.