Nengah perambu tu deka terus nyaga hak Sabah enggau Sarawak lalu perambu nya udah disukung penuh semua ADUN
KUCHING: Kunsil Nengeri ( DUN) Sarawak kemari udah ngemendarka perambu opis menteri bekaul Mosyen Perjanjian Malaysia 1963 ( MA63) enggau pekara ti bekaul.
Speaker Aum Kunsil Nengeri, Datuk Amar Asfia Awang Nassar madahka pemutus nya digaga pengudah mosyen nya disukung kaban DUN.
“Mosyen MA63 ke dibantaika Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas sereta disu- kung Menteri Pemansang Infrastruktur enggau Perengka Pengangkut Tan Sri Datuk Amar James Masing dikemendarka berindik ari semua nyukung enggau nadai bantah,” ku Asfia.
Mosyen nya dibantaika Sapit Kepala Menteri Datuk Amar Douglas Uggah Embas sereta disukung Sapit Kepala Menteri Tan Sri Datuk Amar James Jemut Masing ba hari kedua aum kedua penggal kedua DUN Sarawak Ke18, ba Kompleks DUN ditu, lemai kemari.
Lebuh mantaika perambu nya, Uggah madahka, Menteri Besai Datuk Seri Najib Tun Razak maya ngintu Hari Malaysia 16 September 2017 di Kota Kinabalu madah iya nya hak Sabah enggau Sarawak bekaul enggau MA63 deka terus dijaga.
“Tu dijamin ukai semina retorik politik. Perintah besai meri timbal positif ngagai inisiatif Sarawak ngambi pulai baru hak kitai dibaruh Perjanjian Malaysia.
“Maya nyimpul jurai maya baum kunsil nengeri 30 November 2016 niang Pehin Sri Adenan Satem bisi madahka pemujur runding enggau perintah besai.
“Tu mega ulih dipeda berindik ari Sarawak ti enda ibuh ngena Akta Bekalan Gas sereta bisi hak meresa semua lisin nangkap ikan ba tasik dalam ba kandang Zon Ekonomi Eksklusif (EEZ),” ku iya lebuh mantaika perambu nya.
Bejaku baru iya madahka semua nya dipejalaika bepelasarka danji enggau aku hak nengeri ngagai pelantar benua sereta minyak enggau gis sereta pengeraja asal dalam tasik.
Nya alai ku iya amat beterima kasih ngagai Menteri Besai laban ti ulih beruning sereta meretika peminta kitai ke minta pulai baru hak Sarawak.
Nambahka nya, iya madahka perintah nengeri bebendar deka mutarka isu pelembagaanb enggau engkeman sereta enggau nadai mai ngagai undang-undang sereta enda ngeruga penyerakup enggau kaul manah ke udah bisi entara perintah besai enggau nengeri.
Ku iya, enti isu tu ulih diputarka tu deka ngenegapka agi kaul entara perintah nengeri enggau perintah besai sereta ulih meruan dalam pemaik enggau pengelantang.
“Runding entara perintah nengeri enggau besai patut diatur nitihka penegap runding enggau juluk Perjanjian Malaysia.
“Perintah Sabah enggau Sarawak enda patut digaga tauka dianggap nyadi sebuah nengeri dalam perintah besai tang nyadi menua ti sama enggau numbuhka Malaysia,” ku iya.
Uggah bejaku baru madahka bepelasarka pekara nya tadi madahka, perintah nengeri meri perambu numbuhka Pasukan Petugas Khas renggat tinggi.
Iya madahka Pasukan Petugas Khas nya dikena nyimpul sereta ngemutuska runding enggau perintah besai sereta diputarka nitihka undang-undang sereta nitihka perlembagaan.
Resolusi enggau isu perlembagaan enda tau enda dipejalai tauka diputarka ba renggat tinggi kededua perintah nengeri enggau besai.
“Nya alai, perintah nengeri minta perintah besai enda tau enda nganjung pengari sida dalam petugas khas ngambika pekara tu ulih diputarka enggau lebih manah,” ku iya.
Sebedau dikemendarka, mosyen nya dipejuraika pengari ari Barisan Nasional iya nya Datuk Prof Dr Sim Kui Hian (BN-Batu Kawa) enggau Datu Penguang Manggil (BN-Marudi).
Perambunya mega dipejuaraika penyakal iya nya See Chee How (PKR-Batu Lintang); Wong King Wei ( DAP- Padungan); Chong Chieng Jen ( DAP- Kota Sentosa) enggau Baru Bian (PKR-Ba’Kelalan).
Mosyen MA63 ke dibantaika Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas sereta disukung Menteri Pemansang Infrastruktur enggau Perengka Pengangkut Tan Sri Datuk Amar James Masing dikemendarka berindik ari semua nyukung enggau nadai bantah. Datuk Amar Asfia Awang Nassar Speaker Aum Kunsil Nengeri