Manyin: RUU SRDC udah dikemendar
KUCHING: Rang Undangundang ( RUU) Sarawak Research and Development Council 2017 (SRDC) udah dikemendarka Kunsil Nengeri.
Menteri Pelajar, Sains enggau Pansik Teknologi, Dato Sri Michael Manyin anak Jawong madah, Sarawak ngembuan mayuh penguntung ke unik lalu ulih ngenudukka ketegal misi pengeraja biologikal enggau biodiversiti sereta ngembuan perengka guna dikena mansik enggau penemu ke chukup dikena meransang bala pemansik.
“Pemisi RUU tu ngemendarka menua tu ngamat sereta ngulihka mayuh macham penguntung, baka ba Convention of Biodiversity 1992 ti madahka nengeri tu mayuh pengeraja asal enggau rampa menua ke manah.
“RUU tu mega deka nyendia sereta matak kerejasama ba raban pemansik menua tu enggau palan mansik ke bisi kaul enggau sida ari menua luar, dikena ngenegapka agi pansik enggau pemansang ba mayuh macham pekara kelebih agi ba pekara pansik enggau pemansang dalam klinikal, farmaseutikal sereta biodiversiti ti mungkur pemansang modal mensia enggau reta intelek, ke tau nyadi sebagi ari sukung ngagai pemansang ekonomi Sarawak,” ku Manyin.
Iya madah munyi tu lebuh macha RUU-Bacha Ketiga kali dalam pekara ‘Sarawak Research and development council Bill 2017’ti udah dikemendar ba Kunsil Nengeri (DUN), kemari.
Manyin ti mega nyadi ADUN Tebedu, madahka dalam kandang berapa taun tu ke udah, pengawa mansik enggau pemansang kelebih agi ba produk farmaseutikal, industri pemakai, pengawa betanam betupi enggau bioteknologi udah majak mayuh dipejalaika.
“Tebal agi pemansang tu datai ari pansik ba produk asal, ke datai ari pengeraja biodiversiti ti ditemu ba kampung tropikal di dunya tu. Sarawak tebilang enggau pengeraja biodiversiti enggau biologikal dalam kampung enggau marin, lalu sekeda ari pansik ke dipejalaika nya tetemuka utai ke bisi guna digagaka ubat, lalu dipansik baru mega ungkup pemansang ubat tetemuka asil ulih dikena ngubat HIV, riman prostat enggau tuberculosis (tibi).
“Bisi mega pansik dipejalaika ba utai ke ditanam enggau tanah kerapa, sekeda pun kayu, flora enggau jelu ke dikena berubat chara tradisional, produk pengerai enggau herba.
“Semua pansik tu, polisi sereta strategi enda tau enda diputar enggau manah ke pemujur Perambu Trasformesyen Sosio- ekonomi lalu ngangkatka nengeri tu ngagai tikas pemansang ekonomi. Ketegal nya, RUU tu dibantaika ba Kunsil Nengeri ngambika dikemendarka,” ku iya.
“Taja pia, bisi pengurang ba kerejasama sereta bekunsi penemu sereta kaul ba sekeda ejensi perintah nengeri deka nyapai pemujur ba empas R&D tauka ngangkatka kerejasama enggau palan pansik entarabansa, ke muka jalai ngagai raban pemansik kitai ngulihka penemu baru enggau nguna perengka guna moden dikena bejalaika pansik, ke lalu muka peluang ngagai produk ari pengawa R&D ngerembus makit global,” ku iya.
SRDC ke disadang tu mega deka betuaika Kepala Menteri sereta ngembuan enda kurang ari enam (6) iku sereta enda lebih ari dua belas iku (12) kaban kaunsil, enda nyengkaum chairman.
“Palan tu mega deka ngembuan orang ke endang bisi pengelandik sereta peneleba dalam pekara R&D. Seraban panel penyanding penemu deka disempulang profesional ke ngembuan disiplin dalam sains, teknologi enggau sosiologi tauka pemansang modal mensia, reta intelek, deka nyaup palan tu ba pekara ngaga pemutus mega deka ditumbuhka,” ku iya.