Program ngiri penemu pasal penusah ketegal dadah majak dipejalaika

KUCHING: Program ngiri penemu pasal penusah ke tau nyadi ketegal dadah majak dipejalaika ba semua renggat umur.

Tuju program tu dipejalai endang dikena ngiring komuniti ngambika nemu pasal penusah ke tau nyadi ketegal sereta baka ni dadah tau nganu pengerai kitai, kelimpah ari ngelalau diri empu ngambika ngenyauhka diri enggau diri sebilik ari dadah.

Menteri Pengelantang Pendiau, Orang Indu, Komuniti, Ruang Bilik enggau Pemansang Anak Mit, Dato Sri Fatimah Abdullah madah nyentuk 26 Oktober 2017, urung 89 program enggau aktiviti ngiri penemu pasal nagang sereta nyeliahka dadah udah dipejalaika, ke digulu urung 9,556 iku.

Ku iya, program nya diatur perintah bekerejasama enggau NGO, PEMADAM Sarawak.

Ke taun 2017 ku iya, AADK udah ngatur program’ Sayang Hidup Elak Derita Selamanya’ (SHIELDS) ba 182 buah sekula sekondari di menua, ku iya.

Fatimah madah munyi nya lebuh nyaut tanya ari ADUN Saribas, Mohammad Razi Sitam bekaul enggau pengawa ke dipejalaika perintah dikena nyeliahka penanggul dadah di nenegri tu ba Aum Hari Kedua, Aum Kunsil Nengeri ke-18 ditu, kemari.

Kelimpah ari nya, AADK mega bisi ngaga program ‘Community Empowerment’ ke bala ketuai pupu bansa enggau ketuai ruang bilik ngambika sida berani sereta begempung ngemunaska dadah ba kandang menua sida.

“AADK Nengeri Sarawak nengah AADK Pelilih Menua mega udah ngatur 108 program ngemunaska dadah ti mungkur kandang menua pesisir di serata nengeri tu baka di Mukah, Miri, Betong, Sarikei, Bintulu, Sri Aman, enggau Sibu.

“Kelimpah ari nya, Opis Nasat Pengawa Salah (JSJ) Narkotik Sarawak mega majakka pengawa ngemunas sereta nagang pengawa salah tauka nyual dadah nengah chara ngatur licha enggau pemandang di sekula, ejensi perintah/peribit ke bekaul enggau penusah ke tau nyadi ketegal dadah,” ku iya.